راحىم وشاقباەۆ ەلدەگٸ بٸلٸم سالاسىنا ۇلتتىق قوردان جىل سايىن قوسىمشا قارجى بٶلۋدٸ ۇسىندى, دەپ حابارلايدى قازاقپارات تٸلشٸسٸ.
ۇلتتىق قوعامدىق سەنٸم كەڭەسٸنٸڭ قىزمەتٸنە ارنالعان دٶڭگەلەك ٷستەل بارىسىندا ساراپشى راحىم وشاقباەۆ بٸلٸم سالاسىنىڭ قوردالانعان مەسەلەلەرٸن قوزعادى.
«سٶز جوق, بٸلٸم بەرۋ سالاسىنداعى جاڭارتىلعان باعدارلاما مەن كٶپتەگەن يننوۆاتسييالار ٶتە دۇرىس. بٸراق, بارلىعى جەتكٸلٸكسٸز قارجىلاندىرۋعا كەلٸپ تٸرەلەدٸ. قازٸر پەداگوگتاردىڭ جالاقىسى بارلىق سالالاردىڭ ٸشٸندە ەڭ تٶمەنٸ ەكەنٸن بٸلەمٸز. مۇعالٸمنٸڭ مەرتەبەسٸ مەن بەدەلٸنە قاتىستى قانشاما زاڭدار قابىلداساق تا, نەگٸزگٸ مەسەلە ەڭبەكاقى بولىپ قالاتىنىن ۇمىتپاۋ كەرەك. قازٸر مەكتەپ تٷلەكتەرٸنٸڭ اراسىندا پەداگوگيكالىق ماماندىق تاڭداۋ ەڭ سوڭعى ورىندا. بىلتىر 8 مىڭنان استام گرانت بٶلٸنسە, سونىڭ 4 مىڭنان استامىنا 50-51 بالل جيناعان تالاپكەرلەر يە بولعان. بٸز بولاشاق بالالارعا زاماناۋي قۇندىلىقتار سٸڭٸرۋ ٸسٸن وسىنداي دەڭگەيدەگٸ تالاپكەرلەردٸڭ قولىنا تاپسىرىپ وتىرمىز دەگەن سٶز. بۇل مەسەلەنٸ تەك ەڭبەكاقىنى كٶتەرۋ ارقىلى عانا رەتكە كەلتٸرۋگە بولادى», - دەگەن راحىم وشاقباەۆ ۇستازداردىڭ ايلىعىن ٶسٸرۋگە كەلەر جىلدان باستاپ ناقتى كٸرٸسۋدٸ ۇسىندى.
«2020-2021 جىدلان باستاپ بارلىق مۇعالٸمدەردٸڭ ەڭبەكاقىسىن كٶتەرۋ قاجەت دەپ سانايمىز. ونىڭ كٶلەمٸ ٶڭٸردەگٸ ورتاشا ەڭبەكاقىدان از بولماۋى كەرەك. مۇعالٸمدٸككە تٷسكەن ستۋدەنتتەردٸڭ شەكٸرتاقىسىن كٶتەرۋ ارقىلى بۇل ماماندىقتى تاڭداۋعا ەكونوميكالىق ستيمۋل قالىپتاستىرۋ كەرەك. پرەزيدەنت قاسىم-جومارت توقاەۆ بٸلٸمگە بٶلٸنەتٸن شىعىن كٶلەمٸن جالپى ٸشكٸ ٶنٸمنٸڭ 5 پايىز دەڭگەيٸنە كٶتەرۋ كەرەكتٸگٸن ايتتى. بٸزدٸڭ ويىمىزشا, بۇل 5 پايىزدى مەملەكەت موينىنا الۋى كەرەك. بۇل رەتتە ۇلتتىق قوردىڭ قارجىسىن ٸسكە قوسۋعا بولادى. ٶيتكەنٸ ۇلتتىق قور – ەرتەڭگٸ ۇرپاقتىڭ قورى. قازٸر قولدا بار بيۋدجەتتٸك شىعىندارعا قوسىمشا ۇلتتىق قوردان جىل سايىن 2 ملرد دوللار قاراجات بٸلٸم سالاسىنا بٶلٸنۋٸ كەرەك», - دەدٸ ۇلتتىق قوعامدىق سەنٸم كەڭەسٸنٸڭ مٷشەسٸ.
