Mektep oqýshylary úshin 2020-2021 oqý jyly 25 mamyrda aiaqtalady. Muǵalimderdiń demalys uzaqtyǵy esh ózgerissiz qaldy, dep habarlaidy "Ult aqparat" Bilim jáne ǵylym ministrliginiń baspasóz qyzmetine silteme jasap.
Búgin Bilim jáne ǵylym ministrliginiń apparattyq keńesinde 2020-2021 oqý jylynda jazǵy mektepti uiymdastyrý máseleleri boiynsha túsiniktemeler berildi. Tiisti buiryqqa qol qoiylyp, pedagogterge arnalǵan ádistemelik usynymdar bilim berý uiymdaryna jiberildi.
«Barlyq mektepte oqý jyly 25 mamyrda aiaqtalady. Sonymen birge 19 maýsymǵa deiin jazǵy mektepter jumys isteidi. Balalar óz qalaýy boiynsha, ata-analarynyń ótinishimen 19 maýsymǵa deiin sabaqtarǵa qatysa alady. Muǵalimderdiń eńbek demalysyna qatysty esh ózgeris bolmaidy. Pedagogter ádettegidei jazda 56 kún demalady. Barlyq jumys zań aiasynda, quqyqtyq normalardy saqtai otyryp uiymdastyrylady. Biz kelesi jyly da pandemiianyń saldaryn eskerýimiz kerek. Y. Altynsarin atyndaǵy Ulttyq bilim akademiiasy tiisti jumys atqarýy qajet», – dep atap ótti QR Bilim jáne ǵylym ministri Ashat Aimaǵambetov.
