QR Bilim jáne ǵylym vitse-ministri Bibigúl Asylova orta bilim berý júiesiniń jańartylǵan baǵdarlamaǵa kóshirilýine orai muǵalimderdiń jalaqysy qalai ózgeretinin málim etti, dep habarlaidy QazAqparat tilshisi.
Vitse-ministrdiń aitýynsha, muǵalimderdiń jalaqysyn kóterý bilim berýdiń jańa mazmunyna kóshýmen tikelei bailanysty.
2018 jyldyń 1 qańtarynan bastap bilim berýdiń jańartylǵan mazmunyna kóshken 1-shi, 2-shi, 5-shi jáne 7-shi synyp ustazdarynyń laýazymdyq jalaqysy kóbeiedi. Al qyrkúiek aiynan bastap, 3-shi, 6-shy jáne 8-shi synyp muǵalimderiniń jalaqysy kóteriledi. Osylaisha, 2019 jyldyń qyrkúieginde 4-shi, 9-shy jáne 10-shy synyp ustazdarynyń jalaqysy artsa, 2020 jyly 11-synyp muǵalimderiniń eńbekaqysy joǵarylaidy.
"Ústemeaqy kólemi Memleket basshysy óz Joldaýynda aitqandai, 30 protsentti quraidy. Mysal keltirer bolsaq, 15 jyldyq eńbek ótili bar 1-sanattaǵy qala muǵaliminiń jalaqysyna 24 myń teńge qosylady. Dál osyndai eńbek ótili bar 1-sanattaǵy aýyl muǵaliminiń jalaqysyna 25 860 teńge qosylady", - dep atap ótti Bibigúl Asylova Úkimet úiinde ótken baspasóz máslihatynda.
Atap ótilgendei, úsh jyldyq ótili bar, esh sanaty joq muǵalimderdiń laýazymdyq jalaqysy 56 myń teńgeni quraidy. Oǵan dápter teksergeni jáne kabinetke jetekshilik etkeni úshin 22 myń teńge ústemeaqy qosylady. Iaǵni, qazirgi ýaqytta olardyń jalaqysy 78 myń teńgeni quraidy. Bilim berýdiń jańartylǵan mazmuny úshin ústemeaqy qala deńgeiinde - 16 myń, aýyl deńgeiinde 21 myń teńgeni quramaq. Iaǵni, úsh jyldyq ótili bar, sanaty joq muǵalimderdiń jalaqysy qala deńgeiinde - 96 myń teńge, aýyl deńgeiinde 115 myń teńge bolmaq.
Eger 25 jyl eńbek etken joǵary sanatty muǵalimderdiń qazirgi jalaqysy 83 myń teńgeni quraityn bolsa, oǵan 25 myń teńge kóleminde ústemeaqy jáne jańartylǵan bilim berý baǵdarlamasy úshin taǵy 24 myń teńge qosylady. Osylaisha, eńbekaqynyń jalpy somasy 133 myń teńge bolmaq.
Sonymen birge, BǴM ókilderiniń aitýynsha, biyl muǵalimderdiń biliktilik deńgeiin anyqtaý arqyly qosymsha aqy taǵaiyndaityn jańa júie engiziledi.
"Jańa júiege sáikes, ulttyq biliktilik testin tapsyryp, óz deńgeilerin rastaý arqyly muǵalimder jalaqylaryn 20-50 protsentke deiin kótere alady. Máselen, bir saty joǵarylaǵan 15 jyldyq eńbek ótili bar 1-sanattaǵy qala muǵaliminiń eńbekaqysyna 28 myń teńge qosylsa, aýyl muǵaliminiń jalaqysyna 36 myń teńge qosylady", - dedi vitse-ministr.
Aita keteiik, biylǵy Joldaýda QR Prezidenti Nursultan Nazarbaev muǵalimderdiń jalaqysyn kóterýdi tapsyrǵan edi.
"Jańartylǵan mazmun degenimiz - halyqaralyq standarttarǵa sai keletin jáne Nazarbaev ziiatkerlik mektepterinde beiimdelýden ótken zamanaýi oqý baǵdarlamalary. Bular bizdiń balalarymyzǵa qajetti fýnktsionaldyq saýattylyq pen syni turǵydan oilaý qabiletin darytady.
Sonymen qatar 2018 jyly kategoriialar arasyndaǵy alshaqtyqty arttyryp, muǵalimder úshin biliktilik deńgeiin eskeretin sanattardyń jańa kestesin engizýdi tapsyramyn. Kategoriialardy búkil álemde qoldanylyp júrgen ulttyq biliktilik test arqyly berý kerek. Bul pedagogtardy ózderin udaiy jetildirýge yntalandyratyn bolady. Nátijesinde, muǵalimderdiń jalaqysy biliktiliginiń rastalýyna bailanysty tutastai alǵanda 30 protsentten 50 protsentke deiin ósedi. Bul úshin biyl qosymsha 67 milliard teńge bólý qajet", - delingen Joldaýda.
