Soltústik Qazaqstan oblysynyń ortalyǵy – Petropavl qalasynda pedagogter qaýymynyń balalary mektepke deiingi mekemege kezeksiz qabyldanatyn bolady, – dep habarlaidy "Ult aqparat".
Bul jeńildik bilim berý salasynyń qyzmetkerlerine «Pedagog mártebesi týraly» QR Zańyna sáikes jasalyp otyr.
Qazir tek Petropavl balabaqshalarynda ǵana 1 myń 198 tárbieshi, mektepterde 2 myńnan astam muǵalim eńbek etedi. Olar balalaryn mektepke deiingi bilim berý mekemesine kezeksiz ornalastyrý úshin indigo saityna kirip, ózi jaiynda málimet qaldyrýy tiis.
«Saitqa kirip, óziniń jeke kabinetinde mártebesin rastap, JSN kórsetýi kerek. Jalpy, balabaqshaǵa ornalastyrýda jeńildik buǵan deiin áskeri qyzmetshilerge jasalyp keldi. Budan basqa, kópbalaly otbasydan shyqqan, múmkindigi shekteýli jáne jetim balalar da kezekti kóp kútpeitin», - deidi Petropavl qalalyq mektepke deiingi tárbie jáne oqytý sektorynyń meńgerýshisi Sairan Ispandiarova.
Búginde Petropavlda 6,5 myńnan astam búldirshin balabaqshaǵa kezekte tur. Bul, ótken jylmen salystyrǵanda 3,5 myńǵa az.
«Ata-analarǵa balalaryn kezekke qoiý úshin ákimdikke barýdyń qajeti joq. 2018 jyldan bastap bul qyzmet avtomattandyryldy. Byltyr indigo saitynda «erte brondaý» bólimi engizildi. Jalpy, bul saittan balabaqshaǵa qajetti bar aqparatty alýǵa bolady», - deidi Sairan Ispandiarova.
