Bilim jáne ǵylym ministri Ashat Aimaǵambetov muǵalimderdi attestatsiialaý júiesiniń qalai ózgergenin túsindirdi. Bul júieniń keibir tustaryn jetildirý josparlanyp otyr, dep habarlaidy Sputnik Qazaqstan.
Ministrdiń aitýynsha, búginde respýblika boiynsha barlyq mektepte 289 myńnan astam muǵalim jumys isteidi. Al bilimniń sapasy olardyń kásibi biliktiligine tikelei bailanysty. Sondyqtan ministrlik mektep muǵalimderiniń kásibi biliktiligin kóterýge arnalǵan sharalardy júrgizip keledi.
"Máselen, joǵary jáne birinshi kategoriiany alǵan muǵalimderdiń sany on eki myńǵa artty. Qazirgi kezde olardyń úlesi 54,5 protsentti qurap otyr. Byltyr pedagogtardy attestatsiialaýdyń jańa júiesi engizilgen bolatyn. Ony bárińiz jaqsy bilesizder. Árine, bul júieniń keibir tustaryn áli de jaqsartý qajet. Bilim ministrligi osy máselelermen mindetti túrde ainalysatyn bolady", - dedi Aimaǵambetov esep berý kezdesýinde.
Onyń sózine qaraǵanda, muǵalimderdi attestatsiialaýdyń jańa júiesi negizinde alpys alty myńnan astam pedagog ulttyq biliktilik testin tapsyrdy. Sonyń nátijesinde 30-50 protsenttik ústemaqyny alyp otyr. Ministr eski jáne jańa júieniń aiyrmashylyǵyn da túsindirdi.
"Attestatsiianyń burynǵy júiesin ata-analar jii synap otyratyn. Sebebi ol kezde muǵalimder jai portfoliosyn ǵana tapsyrdy. Sóitip, olardyń qaǵazben tapsyrylǵan jetistikterine baǵa berilip kelgen. Osydan keiin ministrlik pedagogtyń naqty tájiribesin baǵalaý jónindegi sheshim qabyldady. Sondai-aq, alǵash ret naqty pán jáne pedagogika boiynsha test engizildi ", - deidi Aimaǵambetov.
Endi muǵalim aldymen óz páni boiynsha, sosyn pedagogikadan test tapsyrady. Budan keiin onyń jetistikterine qaraidy.
