Muǵalimderdiń jalaqysyn kóterý úshin respýblikalyq biýdjetke ózgerister engizý kerek. Oǵan biraz ýaqyt ketedi. Sondyqtan ázirshe jergilikti biýdjetterdiń esebinen 30 paiyzdyq ústeme aqyny tóleý týraly sheshim qabyldandy, dep habarlaidy QazAqparat tilshisi.
«Búgin ǵana respýblikalyq biýdjet komissiianyń otyrysy ótti. Olar (muǵalimderdiń jalaqysyn 30 paiyzǵa kóterý týraly - avt.) qaýlynyń jobasyn maquldady. Kelesi aptada Úkimettiń kezekti otyrysynda daýysqa salaiyn dep otyrmyz. Sodan keiin atalǵan qujat aimaqtarǵa jiberiledi. Sonyń negizinde jergilikti atqarýshy organdar muǵalimderdiń qańtar aiyndaǵy jalaqysyn jańa júie boiynsha tólei alady. Biz úshin, eń bastysy, muǵalimder jalaqynyń kóterilgenin osy aidyń sońynda kórýi tiis», - dedi QR Bilim jáne ǵylym vitse-ministri Bibigúl Asylova QazAqparat tilshisine bergen suhbatynda.
Onyń aitýynsha, ázirshe 30 paiyzdyq ústeme aqy jergilikti biýdjetterdiń esebinen tólenedi. Artynan respýblikalyq biýdjetti naqtylaǵannan keiin ákimdikterdiń barlyq shyǵyndary óteledi.
«Óitkeni biýdjetti naqtylaýǵa uzaq ketedi. Parlamenttiń talqylaýynan ótkizý kerek jáne taǵysyn taǵy. Sondyqtan ázirshe jergilikti biýdjetterdiń esebinen kótergendi jón kórdik», - dep atap kórsetti B.Asylova.
Aita keteiik, jospar boiynsha aǵymdaǵy jyldyń 1 qańtarynan bastap bilim berýdiń jańartylǵan mazmunyna kóshýine qarai 1-shi, 2-shi, 5-shi jáne 7-shi synyp muǵalimderiniń ailyǵy kóteriledi. Al qyrkúiekte 3-shi, 6-shy jáne 8-shi synyp ustazdary eńbekaqynyń 30 protsentke artqanyn kóre alady. Budan bólek, kelesi jyly qyrkúiek aiynda 4-shi, 9-shy jáne 10-shy synyp muǵalimderiniń jalaqysy kóbeise, 2020 jyly 11-synyp muǵalimderiniń aqshasy artady degen jospar bar.
