Qazaqstan bilim jáne ǵylym salasy qyzmetkerleriniń kásipodaq uiymy tóraǵasynyń orynbasary Aigúl Muqasheva Tamyz keńesine Memleket basshysynyń qatysýy pedagog mártebesin kóterýge jasalǵan eleýli qadam ekenin aitty, dep habarlaidy QazAqparat.
«Pedagog mártebesin retteitin zań jobasy ustazdar qaýymy kópten beri qordalanyp qalǵan máselelerdi sheshedi degen úmitpen otyr. Zań jobasy qazir Úkimetke tústi. Úkimetten keiin Parlament talqysyna túsedi. Erteń respýblikalyq tamyz keńesi bolady. Ol keńesten úlken jańalyq kútemiz. Óitkeni, tarihymyzda birinshi ret Tamyz keńesine el Prezidenti Qasym-Jomart Toqaev qatysqaly otyr», - deidi kásipodaq ókili.
Aigúl Muqasheva ustaz tabysynyń eldegi ortasha eńbekaqy mólsherinen tómen bolýy ádiletsiz dep sanaidy.
«Ustaz mártebesi degende eń birinshi oiǵa eńbekaqy túsedi. Qazir ustazdardyń alatyn jalaqasy respýblikalyq ortasha eńbekaqy mólsherinen 40 paiyz tómen. Oqý bitirip, jańadan jumysqa kirgen muǵalimderdiń jalaqysy nebári 50 myń teńgeden kóp bolmaidy. Kásipodaq tarapynan kópten beri aitylyp júrgen máseleniń biri – jalaqyny esepteý júiesine qatysty. Bazalyq laýazymdyq jalaqy degen uǵym bar. Qazir onyń kólemi – 17 697 teńge. Jalpy jalaqy osy bazalyq laýazymdyq jalaqydan bastap esepteledi. Biz sol bazalyq aqynyń mólsherin minimaldy ailyq eńbekaqy kólemimen teńestirýdi usynyp otyrmyz. Qazir onyń kólemi – 42 500 teńge. Osy indikatordy aýystyrsa, muǵalimniń jalaqysy da naqty óser edi. Ol usynysty áleýmettik seriktestigimiz bolyp sanalatyn QR Bilim jáne ǵylym ministrligi de qoldap otyr, depýtattar da kóterip júr», - degen maman muǵalimder tarapynan kásipodaq uiymyna jyl saiyn myńdaǵan shaǵym túsetinin aitady.
«Bilim jáne ǵylym salasy qyzmetkerleriniń kásipodaǵy eń iri qoǵamdyq uiym bolyp esepteledi. Qatarymyzda 700 myńnan astam kásipodaq múshesi bar. Solardyń júginimderi boiynsha byltyr muǵalimderge tiesili 300 mln teńgege jýyq qarajat qaitaryldy. Iaǵni, muǵalimderdiń eńbekaqysyn zańsyz ustap qalǵan nemese tólenbei qalǵan. Biylǵy alty aidyń ózinde 120 mln teńge ustazdarǵa qaitaryldy. Mańǵystaý oblysynda eńbek demalysy men saýyqtyrý ótemaqysy esebinen tólenetin 6,5 mlrd teńge ýaqytynda aýdarylmaǵany anyqtalǵan bolatyn. Qazirgi tańda bul soma túgel tólendi. Birinshi jartjyldyqta bizdiń kásipodaqqa pedagogtar tarapynan 1,5 myń jazbasha ótinish tústi. Onyń kóbi eńbekaqyny zańsyz ustap qalý nemese tólemei qoiýǵa, jumystan shyǵarýǵa bailanysty aryzdar. Byltyr jumystan zańsyz shyǵarylǵan 44 muǵalim qaitadan jumysqa kirdi. Onyń altaýy sot arqyly quqyǵyn qorǵap shyqty. 113 ustaz jumystan zańsyz shyǵarylǵaly turǵan jerinen qyzmetinde qaldyryldy. Osydan-aq ustazdardyń mártebesi qandai deńgeide ekenin kórýge bolady. Erteńgi tamyz keńesi osyndai máselelerdiń túiinin tarqatýǵa sep bolady degen oidamyz», - deidi Aigúl Muqasheva.
