«Pedagog mártebesi» týraly zań jobasyn daiyndaý bastaldy. Bul týraly búgin QR Parlamenti Senatyndaǵy Úkimet saǵatynda Bilim jáne ǵylym vitse-ministri Elmira Sýhanberdieva aitty, dep habarlaidy "Ult aqparat".
«Elbasy tapsyrmasyna sáikes «Pedagog mártebesi» týraly zań jobasyn daiyndaý bastaldy. Jumys toby quryldy. Búgingi kúni zańnyń tujyrymdama jobasy ázirlendi. Zań jobasy ázirlegennen keiin ministrlik ony barlyq óńirdegi pedagogtar jáne ata-analar qaýymdastyǵymen talqylaidy. Mindetti túrde depýtattardyń aldynda ony aitamyz», - dedi vitse-ministr.
Onyń sózine qaraǵanda, elimizde jan basyna qarjylandyrý tetikterin engizý jalǵasýda. Tiisti normativ bekitildi. Astana qalasynda tolyǵymen 74 mektep jáne 11 jeke menshik mektepte engizilip jatyr. Bul júie ádistemesinde bilim berý qajettilikteri bar balalarǵa 2 ese joǵary qarjylandyrý koefitsenti qarastyrylyp otyr.
«Mektepterdiń 58 paiyzynda inkliýzivti bilim berýge jaǵdai jasalǵan. Bilim jáne ǵylymdy damytýdyń memlekettik baǵdarlamasyna sáikes 2020 jyly inkliýzivti bilim berý 70 paiyzǵa ósedi. Pedagogikalyq mamandyqtar boiynsha kadrlardy daiarlaý aiasynda inkliýzivti bilim berý páni mindetti bolyp sanalady», - dedi ol.
Sonymen qatar, Elmira Sýhanberdieva apatty mektepter men úsh aýysymmen oqytý problemasyna da toqtaldy.
«Bul problemany sheshý úshin biz jyl saiyn 100-den astam mektepti salyp jatyrmyz. Biyl 53 mlrd teńgege 108 mektep salynýda. 3 jyldyq biýdjette 97 mlrd teńgege 73 jańa mekteptiń qurylysy qoldaý tapty. Onyń ishinde 50 mlrd teńgege 34 mektep bar. Úsh aýysymdy mektep máselesin sheshý úshin 33 mektep turǵyzylýda. Taǵy 30 mektep aldaǵy 3 jylda salynady. Onyń 19-y bólingen 50 mlrd teńge aiasynda qarastyrylady. Olardy salý respýblikalyq biýdjet esebinde qoldaý tapty. 41 mektepti jergilikti organdar ózderi salady. Al 9 mektepti jekemenshik investorlardyń kómegimen turǵyzamyz», - dedi ol.
