Biz árqashan bala tárbiesine asa kóńil bólgen ulaǵatty ustazdardyń qoǵamda alatyn orny jóninde, áleýmettik ahýalyn jaqsartý jaiynda qýatty oilarǵa niet qosamyz. Mektepterdiń salynýy, jańa tehnologiialarmen jabdyqtalýy, kóptegen jas mamandardyń aýyldyq jerlerge kelip qyzmet atqarýy – osy nietimizdiń aiǵaǵy ispettes.
Osy oraida, muǵalimder jalaqysynyń jyl saiynǵy ósimine ynta qoiylyp, memleket tarapynan qoldaýǵa ie bolǵany qýantady. Desek te, "bilim berý salasynda, sanaly urpaq tárbieleý jolynda jasaǵan eren eńbekteri laiyqty baǵasyn alyp jatyr ma?" degen saýal kimdi de bolsyn alańdatady. Halyq qalaýlylarynyń jiynynda muǵalimderdiń eńbekaqysynyń azdyǵy, áleýmettik jaǵdaiy jóninde aitylyp, Úkimetke depýtattyq saýaldar joldandy. Jetispeýshilik nátijesinen emdeý-saýyqtyrý oryndaryna muǵalimder kóp barmaǵandyqtan, densaýlyǵyna asa mán berilmeidi. Bul salada týyndaǵan máseleler, kedergi men keleńsizdikter muǵalimder mártebesiniń zańmen bekitilmeýinen dep oilaimyn. Memleketimiz de muǵalimderge qatysty máselelerdiń sheshimin tabýy úshin aianyp jatqan joq.
Elbasynyń bastamasyn tilge tiek ete kele, qoǵamnyń muǵalim mártebesin shynaiylyqpen qabyldaýy úshin zań turǵysynda qoldaý kerek ekeni ýaqyt talaby. Sonda ǵana qoǵamda muǵalimniń mártebesi men bedeliniń artýy tolyqqandy jolǵa qoiylatynyna zańnyń óz yqpalyn tigizeri haq.
Soǵan orai Elbasynyń «Pedagog mártebesi týraly» zańdy bekitýdi usynýy – ustazdardyń qoǵamnyń qurmetti múshesine ainalýyna jol ashty. Osy mezette muǵalimniń áleýmettik jaǵdaiynyń jan-jaqty sheshiminiń tabylýyna serpin berilip, qoldaý kúsheiip, muǵalimderdiń jetispeýshiligi de azaiyp, bul mamandyqqa kelýshilerdiń qatary kóbeiip, yqylas tanytqandardy budan ári yntalandyrar edi. «Pedagog mártebesi týraly» zań aiasynda júktemelerdiń azaiyp, jónsiz tekserister men qyzmetten tys mindetterden ajyratýǵa negiz bolýǵa tiis ekeni aityldy. Bilim berý salasynyń árbir qazaqstandyq otbasyna qatystylyǵyn meńzeýi muǵalimdik mamandyqtyń mańyzyn asha tústi.
Sondai-aq, orta bilim berý júiesinde aiqyndalǵan negizgi máselege nazar aýdara kelip, Nazarbaev ziiatkerlik mektepteriniń oqytý júiesi, onyń ádistemesi memlekettik mektepter úshin biryńǵai standart bolýǵa, bilim sapasyn baǵalaý júiesi halyqaralyq standarttarǵa negizdelýge tiis ekeni aityldy. Orta mektepterde oqýshylardy suranysqa ie mamandyqtarǵa beiimdeýdiń, kásibi diagnostika júrgizýdiń mańyzdylyǵy aityldy. Jas urpaqtyń órkenietti elimizge kózqarasy, jarqyn bolashaqqa degen talaby men talpynysy, tárbie men biliminiń jetilýi – bilim ordasynda qalyptasatyny belgili. Bul úshin ulaǵatty ustazdardyń berer bilimi, tereń tálim-tárbiesi qajet-aq.
Dana TÓLEÝTAIQYZY,
O. Jáýtikov atyndaǵy №1 qazaq orta mektebi direktorynyń tárbie isi jónindegi orynbasary.
