Elbasynyń «Bolashaqqa baǵdar: rýhani jańǵyrý» baǵdarlamasy aiasynda Túrkistan oblysynyń ortalyǵynda Qazaqstan musylmandary dini basqarmasynyń turaqty túrde jumys isteitin ókildigi ashyldy.
Ashylý saltanatyna QR Qoǵamdyq damý vitse-ministri Aryn Berik, oblys ákimi Janseiit Túimebaev, Qazaqstan musylmandary dini basqarmasynyń tóraǵasy, Bas múfti Serikbai Oraz jáne oblys ardagerleri men ziialy qaýym ókilderi, meshit imamdary qatysty.
Túrkistan ólkesiniń bai tarihi tájiribesi, kemel rýhani dástúri jańa oblysty elimizdegi aldyńǵy qatarly óńirlerdiń sapyna shyǵararyn aitqan B.Aryn bul ókildiktiń ashylýy keleli isterdiń uiytqysyna ainalar igi bastama ekenin jetkizdi.
«Túrkistannyń túbi bir túrki jurtynyń rýhani astanasy retinde tanylýynda, osy óńirden kóshpendiler álemine islam dininiń taralýy men ornyǵýyna ólsheýsiz eńbek sińirgen rýhani ustaz – Ahmet Iasaýidiń orny erekshe. Osynaý tarihi dástúrdi, rýhani sabaqtastyqty saqtai otyryp, ony odan ári jańǵyrtý bizdiń basty mindetimiz. Búginde osy qasietti mekende, Qazaqstan Respýblikasy Qoǵamdyq damý ministrligi bastamashyldyǵynyń jáne birlesip atqarǵan jumystarymyzdyń nátijesinde, Qazaqstan musylmandary dini basqarmasynyń ókildigin ashý der kezinde qabyldanǵan oryndy sheshim dep sanaimyz» - dedi B.Aryn.
Sonymen qatar, B. Aryn óz sózinde QMDB-nyń Túrkistan qalasyndaǵy keńse basshysy – Túrkistan oblysynyń ókil imamy retinde Qazaqstan musylmandary dini basqarmasynyń naib-múftii Naýryzbai Taǵanulynyń taǵaiyndalýymen jáne kieli Túrkistan qalasy Túrkistan oblysynyń ortalyǵy bolýymen quttyqtady.
Jiynǵa qatysqan Túrkistan oblysynyń ákimi J. Túimebaev pen QMDB-nyń tóraǵasy, Bas múfti S. Oraz osy tarihi oqiǵa boiynsha ózderiniń jyly lebizderin bilidirdi.
