Qazaqstan musylmandary dini basqarmasy Ramazan aiynyń bastalatyn kúnin, Qadir túni jáne Oraza aittyń merzimin jariialady, dep habarlaidy "Ult aqparat" Qazaqstan múftiiattyń resmi saityna silteme jasap.
Shariǵat jáne pátýa bóliminiń meńgerýshisi Sansyzbai Qurbanulynyń aitýynsha, biyl Ramazan aiy 13 sáýirde bastalyp, 12 mamyrda aiaqtalady.
"Ramazan aiy 30 kún bolady. 13 mamyr – Oraza ait kúni. 8 mamyrdan 9 mamyrǵa qaraǵan tún – Qadir túni", - dedi Qurbanuly múftiiattyń keńeitilgen tóralqa májilisinde.
Al jiyndy ashqan Bas múfti Naýryzbai qajy Taǵanuly jamaǵattyń yńǵaiyna qarai onlain dárister men Quran úiretý sabaqtaryn ótkizýdi jalǵastyrý qajettigin jetkizdi. Halyqqa paidaly ýaǵyz taratý maqsatynda tikelei efirler uiymdastyryp, múmkindigi joq jandarǵa aýyzashar paketterin jetkizý sharalary da qolǵa alynady.
"Sanaýly kúnderden soń qasietti Ramazan aiy kiredi. Musylman úmbeti úshin Ramazan – sondai bir erekshe ai. Elimizdegi qanshama baýyrlarymyz osy aidy kútedi, orazasyn ustaidy. Meiirim men keshirimge, saýapqa toly aidy ádettegidei óz deńgeiinde ótkizýdi Alla násip etsin! Qazirgi jaǵdaidy eskere otyryp, eń bastysy tazalyq pen tártip jaǵyna kóńil bólsek. Osy aida meilinshe qaiyrymdy isterdi kóbirek atqarýǵa shaqyramyn. Jamaǵattyń yńǵaiyna qarai ýaqytyn belgilep onlain dárister, Quran úiretý sabaqtaryn ótkizýdi jalǵastyrýymyz kerek. Halyqqa paidaly ýaǵyz taratý maqsatynda tikelei efirler uiymdastyryp, múmkindigi joq jandarǵa aýyzashar paketterin jetkizý jaǵyn qolǵa alýdy tapsyramyn", - dedi Taǵanuly.
Aita keteiik, májiliste pitir sadaqanyń mólsheri de bekitildi. Biyl onyń kólemi 420 teńge bolady.
