«Áleýmettik meditsinalyq saqtandyrý qory» KEAQ 2018 jyl basynan beri halyqqa qyzmet kórsetken otandyq jedel járdem stantsiialaryna 22,4 mlrd teńge tóledi. Biyl kepildendirilgen tegin meditsinalyq kómek sheńberinde jedel járdem stantsiialarymen 31,5 mlrd teńgeniń kelisimsharty bekitilgen bolatyn. 1 qazanǵa deiin kórsetilgen somanyń 71 paiyzy tólengen. Bul týraly «Áleýmettik meditsinalyq saqtandyrý qory» KEAQ baspasóz qyzmeti habarlady.
Habarlamaǵa súiensek, Qor Batys Qazaqstan oblysyndaǵy «Oblystyq jedel meditsinalyq járdem stantsiiasy» MKK-men 953,4 mln teńgege kelisimshart bekitken. 2018 jyly 1 qazanǵa deiin atalǵan uiymǵa 806 mln teńge aýdaryldy (jalpy somanyń 84,5 paiyzy). Onyń ishinde ádette ustalyp qalatyn avans ta bar.
«Kórsetilgen qyzmet aqysy bekitilgen kelisim talaptaryna sai: qoldanystaǵy normativtik quqyqtyq aktiler talaby boiynsha, tiisti merzimde tólenedi. Jumysshylarǵa jalaqyny der kezinde tóleý máselesi – árbir jedel járdem uiymynyń ishki isi jáne basshylyq pen menshik iesiniń quzyretindegi sharýa», - dedi MSQ basqarma tóraǵasy mindetin atqarýshy Botagóz Jaqselekova.
Esterińizge sala ketsek, biyl Densaýlyq saqtaý ministrligi jedel járdem júiesin reformalaýǵa kirisken bolatyn. Atalǵan reforma boiynsha jedeldigi jaǵynan 4-shi sanatqa jatatyn shaqyrtýlar jergilikti emhanalarǵa beriledi. Nátijesinde qarjylyq jáne ózge de resýrstar emhanalar men jedel járdem stantsiialary arasynda qaita bóliske túsedi. Sonymen qatar, Densaýlyq saqtaý ministrligi jedel járdem stantsiialarynyń menshik iesi bolyp tabylatyn aimaqtyq densaýlyq saqtaý basqarmalarynyń ótinishi boiynsha jedel járdem qyzmetiniń tarifterin kóterip, jyldyq biýdjetti bólý shemasyn ózgertý týraly sheshim qabyldaǵan bolatyn. Qarajat biylǵy jyldan bastap bóline bastamaq.
Qazirgi tańda Densaýlyq saqtaý ministrligi atalǵan sheshimderdi zańdastyryp jatyr. Qosymsha qarajat barlyq normativtik-quqyqtyq aktiler ókiletti organ tarapynan bekitilgennen keiin bólinetin bolady.
«Meditsinalyq saqtandyrý qory jaǵdai rettelgenshe avansty ustamai, qarjyny tolyq tóleý týraly sheshim qabyldady» - dedi B.Jaqselekova.
Qor tegin meditsinalyq kómek paketiniń operatory retinde tiisti sheshimder qabyldanǵanǵa deiin meditsinalyq qyzmetterdi Densaýlyq saqtaý ministrligi bekitken tarifter boiynsha satyp alýdy jalǵastyrady. Sonymen qatar, Qor meditsina uiymdarynyń ishki qarjylyq máselelerine, sonyń ishinde jalaqy máselesine aralasa almaidy, delingen habarlamada.
.jpeg)