Elimizde sońǵy kúnderdegi aptap ystyqqa bailanysty dala órti jiiledi. 19 shilde kúni 31 tabiǵi órt oqiǵasy tirkelgen, dep habarlaidy "Ult aqparat" tótenshe jaǵdailar komitetine silteme jasap.
Aqtóbe, Jambyl, Shyǵys Qazaqstan, Qaraǵandy jáne Qostanai oblystarynda oryn alǵan 19 tabiǵi órt komitet baqylaýynda. Ony mamandar sóndirip jatyr.
Onyń ishinde eń iri eki tabiǵi órt Jambyl oblysynda 18 myń ga alqapty sharpydy. Eldi mekenderge qaýip tóngen joq. Órtti sóndirýge aýa raiy kedergi bolyp otyr: +38 gradýs, jel 17 m/s.
18 shilde saǵat 9:36-da Moiynqum aýdanynyń Moiynqum aýylynan 180 shaqyrymda, Qarabóget aýylynan 50 shaqyrym qashyqtyqta Orman jáne janýarlar dúniesin qorǵaý jónindegi Moiynqum mekemesi aýmaǵynda qumdy jerde 10 myń ga aýmaqta qurǵaq shóp pen sekseýil janǵan.
Órtti aýyzdyqtaýǵa 219 adam, 51 tehnika jáne 1 tikushaq jumyldyryldy.
19 shilde saǵat 13:00-de T.Rysqulov aýdany Qulan aýylynan 100 shaqyrym jerde, Lýgovoi orman sharýashylyǵynyń aýmaǵynda, qumdy jerde qurǵaq shóptiń janýy oryn alyp, Merke aýdany Saryqoba ormanshylyǵy aýmaǵyna ótip, aldyn ala málimet boiynsha 8 myń ga aýmaqta órt shyqty.
Saǵat 10:20-da órt aýyzdyqtaldy. Ony sóndirýge 177 adam men 35 tehnika tartyldy.
Sonymen qatar, ótken táýlikte Almaty, Aqtóbe, Batys Qazaqstan, Jambyl, Qaraǵandy, Qostanai, Pavlodar oblystarynda qurǵaq shóp janǵan.
