Karantin kezinde monshada kóńil kótergen Sybailas jemqorlyqqa qarsy is-qimyl agenttiginiń Aqmola oblysy boiynsha departamentiniń laýazymdy tulǵalaryna sot 10 ailyq eseptik kórsetkish kóleminde aiyppul taǵaiyndady, dep habarlaidy "Ult aqparat" qmola oblystyq sotynyń baspasóz qyzmetine silteme jasap.
«2020 jylǵy sáýirdiń 21-de Kókshetaý qalalyq mamandandyrylǵan ákimshilik soty tótenshe jaǵdai rejimin buzǵan jemqorlyqqa qarsy kúres qyzmetiniń úsh qyzmetkerine maksimaldy jaza taǵaiyndady. QR ÁQbK 32 baby sotqa quqyq qorǵaý organdarynyń qyzmetkerlerine qamaý jazasyn taǵaiyndaýǵa ruqsat etpeidi. Atalmysh quqyqbuzýshylyqty jasaý kezinde onyń qatysýshylary quqyq qorǵaý júiesiniń qyzmetkerleri boldy. Sondyqtan sot R.Turǵambekov, J.Aqmoldin, A.Qaǵarmanǵa 10 ailyq eseptik kórsetkish kóleminde aiyppul túrinde maksimaldy jaza taǵaiyndady», - dedi Aqmola oblystyq sotynyń baspasóz hatshysy Kúlásh Domalaqova.
Sonymen qatar, ol qalǵan ekeýiniń isi erteń qaralatynyn atap ótti.
Aita keteiik, osyǵan deiin habarlaǵanymyzdai, Aqmola oblysy boiynsha sybailas jemqorlyqqa qarsy is-qimyl departamentiniń laýazymdy tulǵalary tótenshe jaǵdai kezinde Kókshetaýdaǵy monsha kesheninde kóńil kóterip jatqan jerinde ustalǵan edi.
Keiin QR Sybailas jemqorlyqqa qarsy is-qimyl agenttigi Aqmola oblystyq departamentiniń tergeý basqarmasy qyzmetkerleriniń tótenshe jaǵdai rejimin buzý faktisi boiynsha qyzmettik tekserý júrgizdi.
Nátijesinde 20 sáýirde agenttiktiń ortalyq apparatynyń tártiptik komissiiasynyń sheshimimen osy oqiǵaǵa qatysy bar jemqorlyqpen kúres qyzmetkerleriniń barlyǵy qyzmetinen qýyldy.
Al, oblystyq departament basshysy M.Tóleýbaev jeke qurammen aldyn alý jumysyn nashar uiymdastyrǵany úshin qyzmetine tolyq sáikes emestigi túrinde jaýapqa tartyldy.
