QR Sybailas jemqorlyqqa qarsy is-qimyl agenttigi Aqmola oblystyq departamentiniń tergeý basqarmasy qyzmetkerleriniń tótenshe jaǵdai rejimin buzý faktisi boiynsha qyzmettik tekserý júrgizdi, dep habarlaidy "Ult aqparat".
Agenttik málimetinshe, atalǵan basqarmanyń basshysy R.Turǵambekovtiń jáne oǵan baǵynyshty tergeýshiler N.Myrzageldinniń, A.Qaǵarmannyń, J.Aqmoldinniń, B.Luqmanovtyń tótenshe jaǵdai rejiminiń qazirgi shekteýlerine qaramastan, keshki demalysty Kókshetaýdaǵy monsha keshenderiniń birinde ótkizgeni anyqtalǵan.
«Osyǵan bailanysty 20 sáýirde agenttiktiń ortalyq apparatynyń tártiptik komissiiasy otyrysy ótti. Oqiǵanyń barlyq jaǵdailaryn jáne ádilettilik, parasattylyq, senim qundylyqtaryn qatań saqtaýdy eskere otyryp, agenttik tóraǵasynyń buiryǵymen atalǵan qyzmetkerler keleshekte memlekettik ári quqyq qorǵaý organdarynda jumys isteý quqyǵynsyz jaǵymsyz sebepter boiynsha jumystan bosatyldy», - delingen taratylǵan aqparatta.
Sonymen qatar tártiptik komissiianyń usynysy boiynsha oblystyq departament basshysy M.Tóleýbaev jeke qurammen aldyn alý jumysyn nashar uiymdastyrǵany úshin qyzmetine tolyq sáikes emestigi túrinde jaýapqa tartyldy.
«Sybailas jemqorlyqqa qarsy is-qimyl agenttigi óz áriptesteriniń teris qylyqtarynyń saldaryn túsine otyryp, azamattardyń karantin rejimin saqtaý kezindegi jaýapkershiligin moiyndap qurmettei kele, oryn alǵan jaǵdai úshin shynaiy keshirim suraidy jáne árbir qyzmetkerdiń ataǵy men dárejesine qaramastan zań buzýshylyq faktisi úshin jazanyń bultartpastyǵyna kepildik beredi», - dedi vedomstvodan.
Buǵan deiin Aqmola oblysynda karantin ýaqytynda monshada demalys jasaǵan jemqorlyqqa qarsy kúres departamentiniń qyzmetkerlerine qatysty qyzmettik tergeý bastalǵanyn habarlaǵan edik.
