Moldovanyń burynǵy premer-ministri, "Áreket jáne yntymaq" oppozitsiialyq partiiasynyń tóraiymy Maiia Sandý jeksenbi kúni ótken prezident sailaýynyń ekinshi týrynda jeńiske jetti. Dúisenbi kúni Moldova ortalyq sailaý komissiiasy taratqan málimet osyny kórsetip otyr. Osylaisha Moldovany alǵash ret áiel-prezident basqaraiyn dep otyr. Munda prezidenttik merzimi - 4 jyl.
Sailaý ýchaskeleriniń 99 paiyzynda hattamalar eseptelgennen keiin Sandýǵa sailaýshylardyń - 57,7 paiyzy, qarsylasy, qazirgi prezident Igor Dodonǵa 42,3 paiyzy daýys bergeni anyqtalǵan.
Túpkilikti qorytyndy AQSh pen Kanadada daýys sanaý tolyq aiaqtalǵannan keiin sál keiinirek jariialanady. Shetelde turatyndardyń basym bóligi Sandýdy qoldaýǵa beiim.
Sailaýdyń birinshi týryndaǵydai, Sandýǵa eldegi iri qala turǵyndary (Beltsten basqasy), jastar, Eýropadaǵy diaspora ókilderi daýys bergen. Dodondy Belts turǵyndary, aýyldyq jerlerde turatyn sailaýshylar qoldaǵan. Gagaýziiada turǵyndardyń 95 paiyzy Dodonǵa daýys bergen.
OSK-nyń aldyn ala málimeti jariialanǵannan keiin Maiia Sandý sailaýshylarǵa alǵys aitty. Ol sailaý kezinde bólinip-jarylǵan qoǵamdy biriktirip, ekonomikalyq máselelerdi sheshýge ýáde berdi. Buǵan qosa, parlamentti taratyp, kezekten tys parlament sailaýyn ótkizetinin de jetkizdi.
Qazirgi prezident Igor Dodon ázirge jeńilgenin moiyndaǵan joq.
Osyǵan deiin Moldovanyń qoǵamdyq saiasat institýty júrgizgen ekzitpol qorytyndysy Sandýdyń - 54,7 paiyz, Dodonnyń 45,3 paiyz daýys jinaitynyn kórsetken edi.
"Intellekt grýp" agenttigi júrgizgen saýalnama qorytyndysy da soǵan uqsas nátije shyǵarǵan.
15 qarasha kúngi sailaýǵa sailaýshylardyń 50 paiyzdan astamy qatysqan. Birinshi týrda shamamen 43 paiyzy ǵana qatysqan edi.
Sońǵy aqparat boiynsha, Moldovanyń ózinde - 1 mln 300 myń adam, shetelde shamamen 250 myń adam daýys bergen.
Maiia Sandý - eýropashyl "Áreket jáne yntymaq" (PAS) partiiasynyń kandidaty. Birinshi týrda ol - 36 paiyz, Dodon 32 paiyz daýys jinaǵan. Sotsialister partiiasy atynan qatysqan Dodon reseishil kandidat bolyp esepteledi. Sandý Eýropamen tyǵyz bailanys ornatýdy qoldaǵanmen Máskeýmen de ara qatynasty buzǵysy kelmeitinin aitady. Onyń pikirinshe, Moldovanyń damýyn tejep otyrǵan nárse - jemqorlyq.
2016 jyly prezident sailaýyna qatysqan Sandý Dodonnan jeńilip qalǵan. 2019 jyly premer-ministr qyzmetin atqarǵan Sandý kútpegen jerden oligarh Vlad Plahotniýkpen alians quryp, aqyry oligarh elden ketýge májbúr bolǵan. Al qyzmetinen bosatylǵan Sandý oppozitsiia jetekshisine ainalǵan.
