Jeksenbi kúni Moldovada ótken prezident sailaýynyń ekinshi týrynda oppozitsiia kandidaty Maiia Sandý qarsylasy qazirgi prezident Igor Dodonnan kóbirek daýys jinady. Sailaý ýchaskeleriniń 90 paiyzynan astamynda daýys sany eseptelgennen keiin sailaýshylardyń 51 paiyzy - Maiia Sandýǵa, 49 paiyzy qazirgi prezident Igor Dodonǵa daýys bergeni anyqtaldy. Moldova aýmaǵynan tys jerde daýys bergenderdiń biýlletenderi áli tolyq qaralyp bitpegen. Sailaýdyń birinshi kezeńinde olar Sandýdy qoldaǵan.
Osyǵan deiin Moldovanyń qoǵamdyq saiasat institýty júrgizgen ekzitpol qorytyndysy Sandýdyń - 54,7 paiyz, Dodonnyń 45,3 paiyz daýys jinaitynyn kórsetken edi.
"Intellekt grýp" agenttigi júrgizgen saýalnama qorytyndysy da soǵan uqsas nátije shyǵarǵan.
Sailaý ýchaskeleri jabylǵannan keiin Igor Dodon Moldova aýmaǵynda qarsylasynan aitarlyqtai dárejede ozǵanyn málimdedi. Ol azamattardy tynyshtyqqa shaqyryp, tártipsizdikke jol berýge bolmaitynyn aitty.
15 qarasha kúngi sailaýǵa sailaýshylardyń 50 paiyzdan astamy qatysqan. Birinshi týrda shamamen 43 paiyzy ǵana qatysqan edi.
Sońǵy aqparat boiynsha, Moldovanyń ózinde - 1 mln 300 myń adam, shetelde shamamen 250 myń adam daýys bergen. Sarapshylar shetelde turatyndardyń Sandýdy qoldaýǵa beiim ekenin aitady.
Maiia Sandý - eýropashyl "Áreket jáne yntymaq" (PAS) partiiasynyń kandidaty. Birinshi týrda ol - 36 paiyz, Dodon 32 paiyz daýys jinaǵan. Sotsialister partiiasy atynan qatysqan Dodon reseishil kandidat bolyp esepteledi. Sandý Eýropamen tyǵyz bailanys ornatýdy qoldaǵanmen Máskeýmen de ara qatynasty buzǵysy kelmeitinin aitady. Onyń pikirinshe, Moldovanyń basty máselesi - jemqorlyq.
2016 jyly prezident sailaýyna qatysqan Sandý Dodonnan jeńilip qalǵan. 2019 jyly premer-ministr qyzmetin atqarǵan Sandý kútpegen jerden oligarh Vlad Plahotniýkpen alians quryp, aqyry oligarh elden ketýge májbúr bolǵan. Al qyzmetinen bosatylǵan Sandý oppozitsiia jetekshisine ainalǵan.
