Moldovada jeksenbi kúni ótken parlament sailaýynyń nátijesinde zań shyǵarý organyna úsh partiia ótti. Sailaýǵa jalpy 20 saiasi partiia qatysqan.
Prezident Maiia Sandýdyń "Áreket jáne yntymaq" partiiasy (PAS) alda keledi. Onyń jaqtastary sailaýshylardyń 47 paiyz daýysyn alǵan.
Olardyń negizgi qarsylasy Moldovanyń burynǵy basshylary Vladimir Voronin men Igor Dodon jetekshilik etetin sotsialisterdiń reseishil aliansyna (BeCS) sailaýshylardyń 31 paiyzy daýys bergen.
Al kásipker Ilan Shor basqaratyn ulttyq-konservativtik "Shor" partiiasy 6,65 paiyz daýys alǵan.
Moldovanyń ortalyq sailaý komissiiasy hattamalardyń 90 paiyzyn sanap shyqqannan keiin 11 shildede túnde osylai dep málimdedi. OSK-nyń málimetinshe, kezekten tys parlament sailaýynda óreskel zańbuzýshylyqtar baiqalmaǵan. Sailaýǵa daýys berýge quqyǵy bar azamattardyń 48,1 paiyzy qatysqan.
Kezekten tys parlament sailaýy – eldegi uzaq saiasi tartystyń nátijesi. Byltyr qarashada prezident sailaýynyń ekinshi týrynda Sandý jeńiske jetken soń reseishil saiasi kúshter men Eýroodaqpen tyǵyz qarym-qatynasty qoldaityn Maiia Sandý jaqtastary arasynda tartys kúsheigen bolatyn.
