Qazaq tilin ultaralyq qatynas tiline ainalandyrǵymyz kelse, qazaq tildi kitaptardy barlyq oblys, aýdandarda qoljetimdi etýimiz qajet. Bul týraly «Uly dalanyń ultaralyq tili» respýblikalyq forýmynda A.Baitursynov atyndaǵy Qostanai memlekettik ýniversitetiniń 1 kýrs stýdenti Anel Pimicheva aitty, dep habarlaidy QazAqparat.
«Men 17 jyl buryn Qostanai qalasynda dúniege keldim. Ata-ájemniń qolynda óstim. Atam qazaq tili meniń bolashaǵyma kerek bolatynyn jaqsy túsinip, úidiń janyndaǵy qazaq balabaqshasyna jáne qazaq mektebine berdi. Bastapqy jyldary biraz qinaldym, ásirese mektepke barǵanda mazmundama jazý men úshin ońai bolmady. Tildi jetik meńgerýime otbasymyzdaǵy jiyn-toilarǵa keletin syily adamdardyń yqpaly óte zor boldy. Tarihtan, ádebietten syr shertetin úlkenderdiń áńgimesine únemi qulaq túrip otyratynmyn. Ásirese, týǵan kún keshterinde dastarhan basynda qazaqtyń dástúrli ánderi oryndalyp, bata-tilekter aitylatyn. 4-synyptan bastap, qazaq tilinen tórt degen baǵa ala bastadym, keiin beske túzedim. Biyl mektep bitirgenimde attestatymda jalǵyz ǵana tórt degen baǵa boldy, ol – orys tilinen...», - deidi moldavan qyzy Anel Pimicheva.
Ol oblystyq, respýblikalyq deńgeide memlekettik tilge, tarihqa qatysty ótetin baiqaýlardyń barlyǵyna qatysyp júretinin aitty.
«Osyndai jarystarǵa qatysatyn kezde Qazaqstan tarihyna qatysty qyzyqty jáne tereń qamtylǵan málimetterdi kóp jaǵdaida orys tilindegi kitaptardan kezdestiremin, al qazaq tilinde taba almaimyn. Ǵylymi materialdar men ádebietter, qazirgi trend bop júrgen sapaly podkasttar jetpeidi. Biraq qazirgi tańda kitap áli de memlekettik tildi qorǵaityn quralǵa ainala alǵan joq. Bul ashy da bolsa – shyndyq. Men siiaqty jastar Qazaqstan tarihyn orys tilinen aýdaryp, oqyp júr. Óz basymnan ótken taǵy bir mysal: jaz kezindegi Berdibek Soqpaqbaevtyń «Ólgender qaityp kelmeidi» kitabyn oqyǵym keldi. Tek internetten taptym. Eger biz Qasym-Jomart Kemeluly aitqandai, qazaq tilin ultaralyq qatynas tiline ainalandyrǵymyz kelse, qazaq tildi kitaptardy barlyq oblys, aýdandarda qoljetimdi etýimiz qajet. Kitaphana sórelerinde turýy tiis, dúkenderde satylýy qajet», - deidi ol.
