Foto: ashyq derekkóz
Qazaqstan Ulttyq bankiniń tóraǵasy Timýr Súleimenov ekinshi deńgeili bankterdiń basshylarymen kezdesý ótkizip, Bankaralyq mobildi tólemder júiesin (BMTJ) damytý jáne telefon nómiri men biryńǵai QR-kod arqyly júzege asatyn bankaralyq aýdarym servisterin iske qosý máselesin talqylady. Bul týraly Ulttyq banktiń resmi habarlamasynda jariialandy, dep habarlaidy Ult.kz.
Kezdesý barysynda «Ulttyq tólem korporatsiiasy» AQ qazirgi tańda engizilip jatqan bankaralyq aýdarym júiesiniń nátijeleri men bolashaq damý josparyn tanystyrdy. Qazirgi ýaqytta bul júiege bes ekinshi deńgeili bank qosylǵan. Júiege alǵashqy bankter qosylǵan sátten beri telefon nómiri arqyly júzege asatyn aýdarymdar kólemi turaqty túrde ósip keledi. Taǵy tórt bank synaqtan ótý jáne tehnikalyq biriktirý kezeńinde tur. Barlyq bankter bul júiege 2025 jylǵy qyrkúiek aiyna deiin qosylady dep kútilýde.
Kezdesý barysynda BMTJ infraqurylymynyń mańyzdy bóligi sanalatyn bankaralyq QR-tólemder servisin engizý máselesi de qaraldy. Júieniń qaýipsizdigin kúsheitý maqsatynda klient derekterin berý formaty qaita qaralyp, endi alaiaqtyq operatsiialardy anyqtaýǵa múmkindik beretin qurylymdalǵan ári tolyq aqparat engizildi. Sonymen qatar, QR-tólemder júiesine qosylatyn bankterge qoiylatyn talaptar kúsheitildi. Bul ózgerister júiege qatysýshy bankter arasynda biryńǵai sapa, qaýipsizdik jáne senim standarttaryn qalyptastyrýǵa baǵyttalǵan.
Jiyn qorytyndysynda taraptar QR-tólem formattary boiynsha kelisimge kelip, tehnikalyq jumystar aiaqtalǵan soń júieni tolyq iske qosý 2025 jyldyń sońyna deiin júzege asady degen boljam jasaldy.
Bankaralyq mobildi tólemder júiesi «Ulttyq tólem korporatsiiasy» AQ bazasynda ázirlenip jatyr. Bul júie klientter men biznes úshin yńǵaily jáne qaýipsiz tólem quraldaryn usyna otyryp, tranzaktsiialardyń ashyqtyǵyn arttyrýǵa, qarajatty qorǵaýǵa jáne zamanaýi qarjy infraqurylymyn qalyptastyrýǵa múmkindik beredi.
Aita keteiik, buǵan deiin Ulttyq bank sarapshylar arasynda júrgizilgen kezekti makroekonomikalyq saýalnama nátijesin jariialaǵan bolatyn. Saýalnamada Brent munaiynyń baǵasy, Qazaqstan ekonomikasynyń ósimi, infliatsiia deńgeii, bazalyq mólsherleme, eksport-import kólemi men teńge baǵamy siiaqty negizgi ekonomikalyq kórsetkishter qamtylǵan.
