Foto: pixabay.com
Premer-ministrdiń orynbasary – qarjy ministri Erulan Jamaýbaev mobildi aýdarymdy paidalanatyn kásipkerlerge eskertý jasady, dep habarlaidy Sputnik Qazaqstan.
Zań boiynsha qarapaiym halyq mobildi aýdarymmen bir-birine aqsha jibere alady. Al kásipkerler bankte eki esepshot ashýǵa tiis. Bireýi jeke aýdarymdar úshin qoldanylsa, ekinshisi kásipkerlik qyzmetke arnalady. Búginde osyndai júiege kóshken biznesmender az emes.
"Biz buny byltyrdan beri aityp kelemiz. Qazirgi kezde mobildi aýdarymǵa bólek esepshot ashqan kásipkerler bar. Olarǵa qatysty eshqandai shara qoldanylmaidy. Al osy júiege kóshpegen kásipkerlerge birshama ýaqyttan keiin másele qoiylady. Qazir eshqandai aiyppul bolmaidy. Al 2025-2026 jyldary biz ondai kásipkerlerdi anyqtap, salyq tólenbegen jaǵdaida aiyppul salynady. Zań talabyn umytpaý kerek, kez kelgen kásipker salyq tóleýge mindetti", - dedi Jamaýbaev Úkimette ótken brifingte.
Onyń aitýynsha, mobildi aýdarymǵa arnalǵan nómirlerdi ilip qoiǵan kásipkerlerge eskertý jasalady. Biraq barlyǵyn tekserip shyǵý qiyn.
"Bizge túsindirý jumystaryn keńinen júrgizý kerek. Óitkeni keibir kásipkerler osy máseleniń mańyzdylyǵyn jete túsinbei otyrǵan siiaqty. Erteń problema bolmaý úshin túsindirý jumystaryn durys ótkizip alǵan jón", - dep atap ótti Qarjy ministri.
