Qytai oqýlyqtarynda Qazaqstannyń bir bóliginiń Qytai jeri dep kórsetilýine qatysty qandai da bir málimet paida bolsa, bul másele úkimetaralyq kezdesýlerde mindetti túrde kóteriledi. Qazaqstan úkimeti buǵan tosqaýyl qoiady. Bul týraly Qazaqstannyń syrtqy ister ministri Qairat Ábdirahmanov málim etti, dep habarlaidy Sputnik Qazaqstan tilshisi.
Buǵan deiin Qytai saittarynda mektep oqýshylaryna Qazaqstannyń Jetisý, Almaty óńiri Qytai jeri dep oqytylatyny týraly aqparat taraǵan bolatyn. Bul másele qoǵamda biraz daý týdyrǵan edi. Osy jaǵdai endi taǵy qaitalanyp jatqanǵa uqsaidy. Jýrnalister syrtqy ister ministri Qairat Ábdirahmanovtan osy máselege qatysty "Qytai úkimetine resmi saýal joldandy ma" dep surady.
"Oqýlyq, kartaǵa bailanysty qandai da bolsyn málimet tússe, biz ony eshqashan nazardan tys qaldyrmaimyz, naqty tosqaýyl qoiamyz. Mundai máselelerge óz aǵymymen júrýge múmkindik bermeimiz. Ózderińizge málim, biz Qytai tarapymen óte tyǵyz bailanystamyz, ekijaqty konsýltatsiialar júrgizip jatyrmyz. Onyń ishinde jeltoqsanda Beijińde ótken qaýipsizdik máseleleri týraly kelissózderdi aitýǵa bolady. Jýyrda úkimetaralyq komissiia aiasynda birsypyra kelissóz ótkizemiz. Osyndai úkimetaralyq kezdesýler arasynda mundai málimet paida bolsa, úkimet atynan kóteremiz. Oǵan eshqandai kúmán bolmaýy kerek", — dedi ministr.
Sondai-aq Ábdirahmanov Qytaida ustalǵan Qazaqstan azamattaryna qatysty da túsinikteme berdi. Aitýynsha, ministrlik bul máseleni baqylaýynda ustap otyr.
"Ustalǵan azamattardyń týystary bizge qajetti málimetterdi berdi. Ol derekter rastalǵan soń, Qytai tarapyna resmi túrde diplomatiialyq nota jiberdik. Sonymen qatar, Beijińdegi elshiligimiz, Úrimshidegi pasporttyq-vizalyq qyzmettiń ókilderi Qytai tarapymen tyǵyz jumys istep jatyr. Tolyq málimet alǵan soń, biz ony mindetti túrde bizge ótinish bildirgen Qazaqstan azamattarynyń týystaryna jetkizemiz", — dedi vedomstvo basshysy.
