Saiasattanýshy Erlan Sairov QR Prezidenti janyndaǵy Ulttyq qoǵamdyq senim keńesiniń otyrysynyń kýlýarynda saiasi júie evoliýtsiialyq turǵyda ózgerip kele jatyr deýge barlyq negiz bar ekenin atap ótti, dep habarlady "Ult aqparat".
«Bizdiń elimizdegi saiasi reformanyń basy bastaldy dep aitýǵa bolady. Parlamenttik oppozitsiia jóninde jańa norma enedi. Bul - bizdiń elimizdiń saiasi landshaftyn ózgertetin úlken sheshim. Óitkeni Parlamentte, sonymen qatar jergilikti máslihattarda balama oi, balama baǵdarlamalarǵa jol beredi. Ekinshi óte úlken sheshim – miting týraly jańa zań. Qazaqstanda eýropalyq standarttar engiziledi. Mitingterdi ótkizý úshin buryndaǵydai ákimdikterden ruqsat suralmaidy. Miting ótkizýshiler shara ótetin jerdegi memlekettik organdarǵa habarlama beretin bolady», - dedi ol.
Sonymen qatar, ol adam quqyǵy jóninde 130 jáne 174 bapqa ózgerister engiziletinin aitty.
«Osy eki bap ta ózgeriske ushyraityn bolady. Osy máselelerdiń barlyǵy - saiasi liberalizatsiianyń júzege asyrylyp kele jatqanynyń dáleli. Qylmystyqtan ákimshilik iske aýysýdy qoǵam oń qabyldaidy dep oilaimyn. Sebebi halyqaralyq deńgeide de bul úlken másele týǵyzǵan bolatyn. Ol Qazaqstan imidjin halyqaralyq arenada da kóteretin bolady», - dedi ol.
Aita keteiik, Ulttyq qoǵamdyq senim keńesiniń otyrysynda Prezident Q. Toqaev QR Konstitýtsiiasyna sai mitingterdiń ótýin habarlamaly túrde retteý qajettigin aitty.
«Mitingter eshbir zańǵa qarama-qaishy kelmese, ruqsat berýge bolady. Olar azamattardyń tynyshtyǵy men qoǵamdyq tártipke kedergi keltirmese, árine. Bul - meniń ustanymym. Biz ony zańnamaly túrde bekitetin bolamyz», - dedi Toqaev.
