Miss Virtual World 2019 ataǵyn jeńip alyp, Meksikaǵa bara almai qalǵan qazaqstandyq arý Arailym Ishahattyń táji Qazaqstanǵa ákelindi, dep habarlaidy QazAqparat.
Jaqynda qazaqstandyq boijetken Meksikadan jetkizilgen tájimen fotosessiia uiymdastyrdy.
21 jastaǵy Arailym Ishahat Atyraý oblysy Inder aýdanynda týǵan. Nur-Sultan qalasynda meditsinalyq ýniversitetti bitirgen. Baiqaý jariialanǵan kezde Arailym oqý ornyn jańadan bitirgen jas maman bolǵan.
Ony konkýrsqa sýret jiberýge ápkesi kóndirgen kórinedi. Baiqaýǵa qatysýǵa ótinish bergen soń boijetken memlekettik organda statistika bólimine bas maman bop jumysqa ornalasady.
«Men ápkemniń aitqanyn tyńdap, sýretimdi jibere saldym. Jai ǵana qarapaiym úi kiimimen túsken sýret bolatyn. Birinshi kezeńnen ótkende tań qaldym. Osylaisha Qazaqstannyń Virtýaldy Arýy atandym. Biraq ulttyq kezeńniń jeńimpazdarynyń barlyǵy birdei finalǵa ótken joq. Arada taǵy internet arqyly daýys berý protsesi júrdi. Meniń sýretterim jetkilikti daýys jinap, Meksikada ótetin Álemniń virtýaldy arýy marapattaý sharasyna shaqyrtý aldym. Halyqaralyq baiqaýǵa shyqqanda sapaly fotolarymdy jiberýge tyrystym. Meksikaǵa barý úshin tipti memlekettik qyzmettegi jumysymnan ketýime týra keldi. Baiqaý nemese jumysty tańdaý kerek boldy. Biraq, men táýekelge bel býdym. Bul bir berilip turǵan múmkindik bolar, al jumys qashanda tabylady dep oiladym», - dedi Arailym.
Dúbirli dodanyń marapattaý sharasy Meksikanyń Kankýn qalasynda 15 qarashada ótken.
Arailymdy ata-anasy muhittyń arǵy betindegi Meksikaǵa jalǵyz jibergisi kelmegen.
«Ata-analarym tanymaityn elge jalǵyz ózimdi jibergisi kelmedi. Biraq olar meniń tańdaýymdy baǵalady. Meksikaǵa jolǵa shyqtym. Tokio arqyly ushyp bara jatqanda vizam durys bolmaǵandyqtan, meni reisten túsirip aldy. Sol kezde qatty jyladym, aýyr kóilekterim salynǵan sómkelerimdi kóterip Qazaqstanǵa qatyp kelýime týra keldi. Sosyn nege bara almaǵanym týraly baiqaý uiymdastyrýshylaryna videoúndeý jiberdim», - dedi Arailym.
Baiqaý uiymdastyrýshylary marapattaý sharasy bolatyn kezde Arailymdy skaip arqyly bailanysqa shyǵýyn ótingen.
«Sosyn tańǵy saǵat 5-te shetelden qońyraý keldi. Uiyqtap jatqanmyn. Maǵan tikelei efirge shyǵýymdy surady. Aq fýtbolkamen shyǵýyma bola ma degenimde, bolmaidy, daiyndyq kerek dedi. Men tez arada qazaqtyń ulttyq kiimin kiip, boianyp úlgerdim. Birneshe saǵattyń ishinde tez daiyndalyp, evirge qosyldym. Ekinshi oryn reseilik arý - Alena Portniaginaǵa buiyrdy. Birinshi oryn Arailym Ishahat degende tipti tańdanystan únsiz qaldym. Ar jaǵynda júrgizýshiler meniń reaktsiiamdy kútip jatyr. Men eshteńe aita alar emespin. Tańdanystan tolqyǵanym sonsha, biraz ýaqytqa deiin deiin oiymdy aita almai qaldym», - dedi boijetken.
Marapattaý saltanatyna jeńimpazdyń kelmegeni qatysýshylar arasynda daý týǵyzǵan. Kóptegen qatysýshylar baiqaýdy uiymdastyrýǵa usynys jasap, internet arqyly berilgen daýystyń ádil sanalǵanyna kúmán keltirgen.
