Qasym-Jomart Toqaev Ózbekstan Respýblikasynyń Prezidenti Shavkat Mirziioevpen telefon arqyly sóilesti, dep habarlady Aqordanyń baspasóz qyzmeti.
"Shavkat Mirziioev Qasym-Jomart Toqaevty Qazaqstan Respýblikasynyń Prezidenti laýazymyna kirisýimen quttyqtap, oǵan zor densaýlyq, amandyq jáne jaýapty memlekettik qyzmetine tabys tiledi. Qasym-Jomart Toqaev quttyqtaǵany úshin Ózbekstan Prezidentine rizashylyq bildirip, Qazaqstan men Ózbekstan arasyndaǵy eki el halyqtarynyń tatý kórshiligi men dostyǵyna negizdelgen strategiialyq seriktestik jalǵasa beretinine senim bildirdi", - delingen habarlamada.
Eki el kóshbasshylary bir-birin Naýryz meiramymen quttyqtady.
Memleketter basshylary Qazaqstan Respýblikasynyń Tuńǵysh Prezidenti – Elbasy Nursultan Nazarbaevtyń Qazaqstan men Ózbekstannyń qazirgi qarym-qatynastaryn qalyptastyrý jáne ony damytý jolynda erekshe ról atqarǵanyn atap ótti.
Telefon arqyly sóilesýge Ózbekstan jaǵy bastamashy boldy.
Sonymen qatar, Qasym-Jomart Toqaev Ázerbaijan Respýblikasynyń Prezidenti Ilham Álievpen telefon arqyly sóilesti.
Ilham Áliev Qasym-Jomart Toqaevty Qazaqstan Respýblikasynyń Prezidenti laýazymyna kirisýimen quttyqtap, jaýapty memlekettik qyzmetine tabys tiledi.
Qasym-Jomart Toqaev quttyqtaǵany úshin Ázerbaijan Prezidentine rizashylyq bildirip, Qazaqstan men Ázerbaijan arasyndaǵy ózara yqpaldastyqty jan-jaqty damytýdyń baǵyty ózgermeitinin atap ótti.
Memleketter basshylary Qazaqstan Respýblikasynyń Tuńǵysh Prezidenti – Elbasy Nursultan Nazarbaevtyń Qazaqstan men Ázerbaijannyń qarym-qatynastaryn qalyptastyrý jáne ony nyǵaitý isinde erekshe ról atqarǵanyn atap ótti.
Sondai-aq, eki el kóshbasshylary bir-birin Naýryz meiramymen quttyqtady.
Telefon arqyly sóilesýge Ázerbaijan jaǵy bastamashy boldy.
