Ózbekstan prezidenti koronavirýsqa qarsy vaktsinalaýdy tezdetýdi buiyrdy. Bul týraly el prezidenti Shavkat Mirziioevtiń tóraǵalyǵymen ótken videoselektorlyq keńes qorytyndylaryn shyǵarý kezinde belgili boldy, dep habarlaidy "Ult aqparat".
«Turǵyndarǵa koronavirýsqa qarsy vaktsina engizýdi bastaý qajet. Densaýlyq saqtaý ministri men Sanitarlyq-epidemiologiialyq ahýal jáne qoǵamdyq densaýlyq qyzmetiniń basshysy birinshi kezekte vaktsina egilýi tiis turǵyndar sanatyn anyqtap, elektrondyq tizim qurýy tiis», - dedi Ózbekstan prezidenti.
Shavkat Mirziioev sondai-aq qosymsha mobildik toptar qurýdy tapsyrdy.
«Otbasylyq emhanalar men aýyldyq dárigerlik pýnkterde vaktsinalaýdyń 3 myń bólimshesin daiarlaý qajet. Sondai-aq, turǵyndarǵa vaktsina egýmen ainalysatyn mobildik brigadalar qurý kerek», - dep túiindedi ol.
Eske sala ketsek, buǵan deiin Sanitarlyq-epidemiologiialyq ahýal jáne qoǵamdyq densaýlyq qyzmetiniń basshysy Botirjon Qurbanov Ózbekstan biligi 2021 jyldyń sońyna qarai el turǵyndarynyń 20 paiyzyn koronavirýsqa qarsy vaktsinalaýǵa nietti ekenin málim etken. Onyń sózinshe, jappai vaktsinalaýdy bastaý aqpan aiynyń sońy, naýryzdyń basyna josparlanǵan.
«Vaktsinalaý protsesi búkil Ózbekstandy qamtidy, biraq ol kezeń-kezeńmen ótedi. Birinshi kezeńde Pfizer vaktsinasynyń 100 myń dozasyna tapsyrys berildi, taǵy basqa litsenziialanǵan vaktsinalar paida bolǵan jaǵdaida, olar da paidalanylady», - dedi Qurbanov.
