"Qazaqstan" teleradiokorporatsiiasy "Mirjaqyp. Oian, Qazaq!" filmin prokattan alyp tastaý sebebin túsindirdi, dep habarlaidy Sputnik Qazaqstan.
"Mirjaqyp. Oian, Qazaq!" filmi Kinopark pen Kinoplexx kinoteatrlarynda kórsetildi.
Kompaniianyń PR-direktory Erlan Buharbaevtyń aitýynsha, halyq tarapynan suranys joǵary boldy. Biraq "Qazaqstan" teleradiokorporatsiiasy aiaq astynan prokatty toqtatýǵa sheshim qabyldady.
"Mirjaqyp. Oian, Qazaq!" filmi bizdiń kinoteatrlarymyzda eki aptadan astam ýaqyt boiy kórsetildi. Halyq qazaq tilinde jaqsy túsirilgen filmge kóp keldi. Biraq filmniń quqyq iesi, iaǵni, "Qazaqstan" teleradiokorporatsiiasy aiaq astynan prokatty toqtatýǵa sheshim qabyldady. Olar suranys joǵary ekenin kórip, filmdi telearnadan kórsetemiz dep sheshti. Bizde tiisti hat ta bar", - dedi Buharbaev Sputnik Qazaqstan tilshisine bergen suhbatynda.
Al teleradiokorporatsiianyń baspasóz hatshysy Aidyn Dúisenbaiqyzynyń aitýynsha, kelisimshart áý basta eki aptaǵa jasaldy. 15 kúnde filmdi 140 myńnan astam adam kórip úlgerdi.
"Mirjaqyp. Oian, qazaq! " filmi "Qazaqstan" teleradiokorporatsiiasynyń prokat kompaniialarymen kelisimshartyna orai kinoteatrlarda 21 qyrkúiekten bastap eki apta boiy júrdi. Prokat merzimi keshe aiaqtaldy. Film jaqyn arada "Qazaqstan" arnasynyń efirinde jáne jańa onlain-platformada kórsetiledi", - dep túsindirdi Dúisenbaiqyzy.
Aita keteri, bul film - "Qazaqstan" teleradiokorporatsiiasynyń ótken jyly túsirgen 6 bólimdi serialynyń negizinde óńdep shyǵarǵan ónimi. 6 bólimdi "Mirjaqyp. Oian, qazaq!" serialy ótken jyldan beri arnanyń YouTube jelisi men resmi saitynda ashyq tur.
