"مٸرجاقىپ. ويان, قازاق!" فيلمٸ پروكاتتان نەگە الىندى?

"قازاقستان" تەلەراديوكورپوراتسيياسى "مٸرجاقىپ. ويان, قازاق!" فيلمٸن پروكاتتان الىپ تاستاۋ سەبەبٸن تٷسٸندٸردٸ, دەپ حابارلايدى Sputnik قازاقستان.

"مٸرجاقىپ. ويان, قازاق!" فيلمٸ Kinopark پەن Kinoplexx كينوتەاترلارىندا كٶرسەتٸلدٸ.

كومپانييانىڭ PR-ديرەكتورى ەرلان بۇحارباەۆتىڭ ايتۋىنشا, حالىق تاراپىنان سۇرانىس جوعارى بولدى. بٸراق "قازاقستان" تەلەراديوكورپوراتسيياسى اياق استىنان پروكاتتى توقتاتۋعا شەشٸم قابىلدادى.

"مٸرجاقىپ. ويان, قازاق!" فيلمٸ بٸزدٸڭ كينوتەاترلارىمىزدا ەكٸ اپتادان استام ۋاقىت بويى كٶرسەتٸلدٸ. حالىق قازاق تٸلٸندە جاقسى تٷسٸرٸلگەن فيلمگە كٶپ كەلدٸ. بٸراق فيلمنٸڭ قۇقىق يەسٸ, ياعني, "قازاقستان" تەلەراديوكورپوراتسيياسى اياق استىنان پروكاتتى توقتاتۋعا شەشٸم قابىلدادى. ولار سۇرانىس جوعارى ەكەنٸن كٶرٸپ, فيلمدٸ تەلەارنادان كٶرسەتەمٸز دەپ شەشتٸ. بٸزدە تيٸستٸ حات تا بار", - دەدٸ بۇحارباەۆ Sputnik قازاقستان تٸلشٸسٸنە بەرگەن سۇحباتىندا.

ال تەلەراديوكورپوراتسييانىڭ باسپاسٶز حاتشىسى ايدىن دٷيسەنبايقىزىنىڭ ايتۋىنشا, كەلٸسٸمشارت ەۋ باستا ەكٸ اپتاعا جاسالدى. 15 كٷندە فيلمدٸ 140 مىڭنان استام ادام كٶرٸپ ٷلگەردٸ.

"مٸرجاقىپ. ويان, قازاق! " فيلمٸ "قازاقستان" تەلەراديوكورپوراتسيياسىنىڭ پروكات كومپانييالارىمەن كەلٸسٸمشارتىنا وراي كينوتەاترلاردا 21 قىركٷيەكتەن باستاپ ەكٸ اپتا بويى جٷردٸ. پروكات مەرزٸمٸ كەشە اياقتالدى. فيلم جاقىن ارادا "Qazaqstan" ارناسىنىڭ ەفيرٸندە جەنە جاڭا ونلاين-پلاتفورمادا كٶرسەتٸلەدٸ", - دەپ تٷسٸندٸردٸ دٷيسەنبايقىزى.

ايتا كەتەرٸ, بۇل فيلم - "قازاقستان" تەلەراديوكورپوراتسيياسىنىڭ ٶتكەن جىلى تٷسٸرگەن 6 بٶلٸمدٸ سەريالىنىڭ نەگٸزٸندە ٶڭدەپ شىعارعان ٶنٸمٸ. 6 بٶلٸمدٸ "مٸرجاقىپ. ويان, قازاق!" سەريالى ٶتكەن جىلدان بەرٸ ارنانىڭ YouTube جەلٸسٸ مەن رەسمي سايتىندا اشىق تۇر.