Miras Muqash - QR Aqparat jáne kommýnikatsiia ministriniń keńesshisi

Jazýshy-jýrnalist Miras Muqash QR Aqparat jáne kommýnikatsiia ministriniń keńesshisi bolyp taǵaiyndaldy.

Miras Muqash buǵan deiin Qazaqstan Ulttyq telearnasynyń jańalyqtar bóliminde jumys istegen bolatyn.

Jaqynda ǵana QR Aqparat jáne kommýnikatsiia ministriniń keńesshisi qyzmetin atqarǵan  Qambar Ahmetov jańa qyzmetke aýysqan-dy. Qambar Ahmetov «Egemen Qazaqstan» gazeti Bas redaktorynyń orynbasary bolyp taǵaiyndaldy. Endi bul qyzmetke qarymdy jýrnalist, tanymal jazýshy Miras Muqash keldi.

Aita ketsek, Miras Qultóleýuly Muqash 1985 jyly 7 qańtarda Almaty qalasynda dúniege kelgen. 2001 jyly №92 qazaq-orys orta mektebin bitirdi. 2005 jyly ál-Farabi atyndaǵy Qazaq Ulttyq ýniversitetiniń jýrnalistika fakýltetin támamdaǵan.

Kóptegen respýblikalyq basylymdarda jumys istedi. «Habar» Agenttiginde «Jańalyqtar» bóliminiń tilshisi, Qaraǵandy oblysyndaǵy menshikti tilshisi, «Qazaqstan» Ulttyq telearnasynyń tilshisi bolyp qyzmet atqardy. «Jetinshi arnada» «Nysana» qorytyndy baǵdarlamasynyń tilshi-redaktory boldy. Qazaqstan Jýrnalister odaǵynyń múshesi. 

Mirastyń áńgimeleri kóptegen basylymdarda jáne «Jalyn» baspasynan shyqqan «Jas tolqyn» jinaǵynda jariialandy. «Aq shaǵala» atty prozalyq kitaby jaryq kórgen.

Ult portaly ujymy Miras Muqashty erekshe yqylaspen quttyqtai otyryp, aldaǵy jumystaryna sáttilik tileidi.