Naǵyz qazaq qazaq emes,
Naǵyz qazaq – dombyra
Qadyr Myrza Áli
Dombyra – kúmbirlegen dáýir jyry,
Daýysy ulasqandai daýylǵa uly!
Shattyǵy qaýyrsynnyń jeńildigi,
Qaiǵysy qorǵasynnyń aýyrlyǵy!
Ózegin saǵan bergen aqyn julyp,
Orynyn saǵan bergen batyr turyp!
Qap-qalyń kitaptardyń mazmun júgi,
Jup-juqa shanaǵyńda jatyr tunyp!
Qos ishek, toǵyz perne, sheshen shanaq,
Ker zaman seni de atqan kesel sanap!..
Dombyra kókiregi sher – kóne mura,
Kók túrik tórine ilgen kósem sanat!
Estirtken eńkildep kúi – hanǵa qaza,
Dombyra – qarsy teńeý dańǵazaǵa!
Terbeidi sendegi sóz júrek kólin,
Bermeidi sendegi saz janǵa maza!
Ketbuǵa – kúidiń piri, shabytty erden,
Dombyra qalǵan mura – anyq kómbem!
Júregi han aldynda shailyqpaǵan,
Atyńnan ainalaiyn, halyq bergen!
Dombyra – qazaq úshin ǵumyr máni,
Sen tókken kúimen rýhym jyǵylmady!
Dombyra – suńqar edi baldaqtaǵy,
Dombyra – tulpar edi tuǵyrdaǵy!
Shyqqanda keń shanaqtan gúl órilip,
Jarq eter kókjiekten kúder úmit!
Nemese "Qosbasary" býyndy alar,
Pernesin kúishi bassa tym erinip...
Qos mektep – Táttimbet pen Qurmanǵazy,
Ekeýi eki úlginiń dúr mańǵazy!
Bireýi tókpe kúidiń tóreshisi,
Bireýi shertpe kúidiń syrbaz máni!
Baǵzydan jetken mura qyz-ulǵa aman,
Dombyra – qyzyl bóri, qyzyr qaǵan!
Betinde qý taqtaidyń qyzyl arsha,
Ishegi taýtekeniń yzyńdaǵan!
Qobyzdy Qorqyt desem qol kósemi,
Dombyra – Dospambetsiń sen keshegi!
Dina men Aqqyzdaisyń – dariǵa aqqý,
Tógilgen Táttimbetsiń tórde sheri!
Dombyra – sen Turansyń qamal berik,
Ordańa qut daryǵan Qaǵan qonyp!
Túmen bap Túrkistansyń kóne astana,
Bastaǵan basty Ordasyń babam joryq!
Abylai aq týysyń – azat bairaq,
Dombyra asyl pyshaq, ǵajap qairaq!
Eshbir jaý attai almas esigińnen,
Dombyra barda qylmas qazaqqa aibat!
Quryshtan quiylǵandai berik buiym,
Qylyshtan ótkir seniń joryq kúiiń!
Meni de ilep ótti zulmat nebir,
Seni de túirep ótti soǵyp quiyn!
Dombyra – kókei kesip, kisen ashqan,
Ondaida Jerge ainalyp túsedi Aspan!
Kezekti alǵan kezde naqysty kúi,
Ózekti órttei qaýyp ishek osqan!
Dombyra – baǵzy mura Saqtan beri,
Alashtyń aiboz daýsy, aqtańgeri!
Dombyra – tylsym aǵash nur sipatty,
Shuǵyla shanaǵynan soqqan lebi!
Aýmaisyń er Tólegen, ór Jibekten,
Shegińde shejiresi eldiń ótken!
Perneńdi boilaýyq kúi balqytqanda,
Perdesin jannyń appaq jelbiretken!
Sileigen balbalymdai sal dombyra,
Súleimen baldaǵyndai mán dombyra!
Arymnyń Ai didarly, Kún sipatty,
Jarymnyń júzin ashqan án dombyra!
Dombyra – sende rýhy han Keneniń,
Jetkizdiń kókke týdyń jan kemelin!
Qolyma alsam seni Talasbektei,
Túsimde túmen-túmen qol kóremin!..
Mahambet – sen dep bergen qairan basyn,
Namysyń qaidan sosyn qairalmasyn!..
Shertkende jan dybysyn qanmen teýip,
Derttengen kóńilimde oinar jasyn!
Tartqanda úsh ishektep, teris burap,
"Qońyr qaz" ushar betke alys qulap!..
Dombyra – Arqadaǵy Aqan seri,
Dombyra – pań Qulager qamys qulaq!
Shertkende sheber saýsaq biiazy lep,
Kókeige qudiretin quiar izet!
Dombyra – sen Abaisyń sóz patshasy,
Dombyra – sen Adaisyń kúi áziret!
Qashaǵan, Aqtan aitqan sóz muraǵat,
Kúi bolyp Mańǵystaýdy kezdim abat!
Dombyra – Dariiadai asaý sýda,
Nurtýǵan, Nartai jeke – ózge ulaǵat!
Basynda Baiantaýdyń Máshhúr Júsip,
Sóiledi dombyradai tasqyn qysyp...
Airylyp qaldym sol bir parasattan,
Kózine qapiiada qastyń túsip...
«Qarqaraly basynda jalǵyz arsha»,
Tietin ándei kim bar janǵa uzansha!
Alty qyr astyndaǵy sal túsken úi,
Áýeni áýdem jerden tańǵa uzarsa!
Dombyra daýysynda Alash úni,
Kózimniń aǵy da sol, qarashyǵy!
Tiegi – tobylǵynyń qatty dińi,
Súiegi – qyzyl qaiyń, aǵash iri!
Sen barda baitaǵym keń, ulysym bai,
Qaitemin osyndaida ulysynbai!
Sańq etip Qazybektiń kómeiindei,
Jarq etip Qabanbaidyń qylyshyndai!
Jetisý jeti jarǵy maqamysyń,
Maqpaldy, úkilisiń, oqalysyń!
Kenendei Alataýdyń basyn bult qyp,
Jambyldai otqa tústiń Otan úshin!
Súgirdiń Qarataýda shertisi – órnek,
Aǵady Syrdy boilap, Ertis órlep!
Ústirttiń ústindegi ún túsimde,
Sińedi shaǵyldarǵa derti shóldep...
Altaidyń arǵy beti, bergi basy,
Qazaqtyń qaraǵaily dombyrasy!
Ámire, Ásetterdiń ár ánine –
Alashtyń Álihandai jan kýási!
Birjansyń – Qoiandyny ánmen ashqan,
Sákensiń – taý ishinde sáýleli aspan!
Dombyra – Júsipbek pen Jánibeksiń,
Qazaqty qara óleńmen ánge qosqan!
Jaralǵan zaman eski, jurt kónede,
Dombyra – tórimdegi qut dódege!
«Qońyry» Ábikenniń – Alash zary,
Ómiri Áshimtaidyń ultqa ónege!
Saidaly sary Toqanyń sarynynda,
Aparar súrleý jatyr ary Ǵunǵa!
Dombyra – Baijigitsiń kúi qaǵany,
Dombyra – Kókbalaqsyń anyǵynda!
Dairabai, Qyzdarbeksiń – kúi mektebi,
Itaiaq, Sembek, Ábdi – túidekteri.
Manarbek, Maǵaýiia – qos dombyra,
Úlgi ultqa – úmit shamy, úiretkeni!
Eki shek, oǵyz perne, tiek kepil,
Arbaǵan siqyr sazy – jibek kókil!..
«Kóruǵly» kókjiekten kóringende,
Syrqyrar kórde jatqan súiek nópir!
Qandyrar jiti qulaq shyn quryshyn,
Qairattyń kómeiinde bir dybysyń!
Dombyra – Aqseleýdiń «Saryarqasy»,
Tar eken Saryarqa da – dúldúl úshin...
Dombyra – qoinaýyń qut, qońyr óleń,
Aidalǵan Jaiaý Musa senimenen!..
Atylyp Mádi seri qapylysta,
Qalǵansyń tar qapasta, temir eden...
Jyraýdyń jyry sensiń – Alpamystai,
Baishubar qos ishekte qaitedi ushpai!..
Dombyra shertilmese batyryna,
Qalady Gúlbarshyndai jar tabyspai!
Dombyra – Beibaryssyń Mysyrǵa asqan,
Dombyra – Ámir Temir – kúshiń dastan!
Dombyra – Súiinbaidyń aldaspany,
Qalshityp Qataǵannyń mysyn basqan!
Aitystyń dombyra alǵash – aqtańgeri,
Shomylǵan sulý sózdiń maqpal kóli!
Dombyra – babam qiyr jatqan jeri,
Dombyra – qazaq qazyq qaqqan jeri!
Dombyra - qypsha beldi, alma moiyn,
Has sulý taranǵandai talǵam, oiym!
Dombyra Tumar áje bolmysyndai,
Kórsetpes jatqa betin, jaýǵa boiyn!
Dombyra – án jaýyny, kúi nóseri,
Babadan qalǵan mura syi keshegi:
Dombyra – qazaǵymnyń taqiiasy,
Dombyra – qazaǵymnyń kimeshegi!
Dombyra – Nurǵisasyń saz dúldúli,
Súiekten ótedi ótkir sóz kúmbiri!
Qara shal qaǵysynda qaz qańqyldap,
Kelinshek shalysynda jaz bulbuly!
Dombyra – «Aq jaýyny» Seken dúrdiń,
Óksigi óńeshimde óter kúnniń!..
Tolqyny kóńilińniń kólin shaiqar,
Sol máńgi, qalǵany bos, beker...qurbym!..
Saýyrly shanaq úni netken asqaq,
Barady gákký dybys kókke bastap!..
Kim aitty seni aǵash dep sańǵyrlaǵan –
Alashqa máńgi ainalyp ketken aspap!
Dombyra – sen jýsansyń burqyraǵan,
Kózimniń jasyn saǵan irkip alam!
Sen narǵa kóp uqsaisyń júk qaldyrmas,
Dombyra sen esende – jurtym aman!
Seriniń sen kózisiń – sal kúligim,
Bailyǵym, baqyt, yrys, mal-múligim.
Dombyra, sende jatyr bar ǵumyrym,
Júrekke jetkize ber án dúbirin!
Dombyra – sen qymyzsyń túnemeli,
Dombyra – sen shaiyrdyń uly óleńi!
Dombyra – sertti jannyń jan serigi,
Dombyra – dertti jannyń júrek emi!
Ketemin, kúiiń meńdep, emirenip,
Ketemin, sazyń terbep, tebirenip!
Qudaidyń bizdi súigen bir kýási,
Dombyra, bul qazaqqa seni berip:
Tańdaiǵa Alash rýhyn tamyzdy azat!
Dombyra, sen jaily aitar ańyz ǵajap!
Tórimde turǵai máńgi tól aspabym,
Tóbeme tuttym seni – Naǵyz Qazaq!
Miras Asan
