24 tamyzda Minsk traktor zaýytynyń aldynda arnaiy jasaq oppozitsiialyq úilestirý keńesiniń músheleri Olga Kovalkova men Sergei Dylevskiidi ustady. Bul týraly Azattyqtyń Belarýs qyzmeti habarlady. "Belsattyń" jazýynsha, olarǵa "ruqsat etilmegen shara uiymdastyrdy" degen aiyp taǵylǵan.
Úilestirý keńesi ókilderiniń málimetinshe, Kovalkova men Dylevskiidi ákimshilik is aiasynda ustaǵan, olarǵa aiyppul salynýy múmkin. Eki belsendini arnaiy jasaq dúisenbi tańerteń avtozakqa otyrǵyzyp alyp ketken.
Minsk militsiiasy oppozitsionerlerdi ákimshilik is aiasynda ustaǵanyn rastady.
Belarýs oppozitsiiasy buǵan deiin bilikti beibit aýystyrý jónindegi úilestirý keńesin qurǵanyn habarlaǵan bolatyn. Bul organ prezident sailaýyna qatysqan oppozitsiia kandidaty Svetlana Tihanovskanyń bastamasymen qurylǵan dep aitylady. 24 tamyzda úilestirý keńesi músheleriniń baspasóz jiyny ótýi tiis.
Buǵan deiin Belarýs prezidenti Aleksandr Lýkashenko ereýilge shyqqan kásiporyndardy dúisenbiden bastap jabýdy tapsyrǵan edi. Onyń pikirinshe, bul sharanyń el ekonomikasyna ziiany joq, esesine eldegi jaǵdaidy turaqty etýge kómektesedi. Degenmen ereýilge shyqqan zaýyttardyń jabylǵany týraly aqparat túspedi.
24 tamyzda Lýkashenko narazylyqty qoldaityn mektep muǵalimderin jumystan shyǵarýdy da talap etti.
Belarýste 9 tamyzdan beri Aleksandr Lýkashenkonyń otstavkasy jáne saiasi tutqyndardy bosatýdy talap etken narazylyq sharalary jalǵasyp jatyr.
Jeksenbi kúni elde "Jańa Belarýs marshy" ótip, Minskidegi aktsiiaǵa keminde 200 myń adam qatysty. Áleýmettik jelide jariialanǵan videoǵa sáikes, bronjelet kiip, qolyna Kalashnikov avtomatyn ustaǵan Lýkashenko tikushaqpen Minsk tóbesinen ushqan.
