Minsk soty 89 jastaǵy zeinetkerge "sherý zańyn buzǵany úshin" aiyppul saldy. Belarýs militsiiasy ótken aida Aleksandr Lýkashenko otstavkasyn talap etken narazylardy ustaǵanda arasynda Valeriia Smirnova da bolǵan.
12 qańtarda Lenin aýdandyq soty ony "ruqsat etilmegen sharaǵa qatysqany úshin" kináli dep tanyp, 870 belarýs rýbli (337 dollar) kóleminde aiyppul salǵan. Bul eldegi ortasha jalaqy mólsheriniń jartysyna teń.
Smirnova 14 jeltoqsanda dúisenbi saiyn ótetin zeinetkerlerdiń demokratiialyq qozǵalystardy qoldaý aktsiiasynda arnaiy jasaq ustaǵan júzden astam adamnyń biri. Sol kúni onyń qyzy 67 jastaǵy Liýdmila Bystrenko da ustalǵan. Ol militsiia bólimshesinde 6 saǵattan astam ýaqyt qamaýda bolǵannan keiin bosatylǵan.
Smirnovanyń nemeresi Dariianyń sózine qaraǵanda ájesi sherý kezinde "Belarýs jasasyn!" dep aiqailaǵany úshin jazalanǵan. Tut.by saitynyń jazýynsha, sot kezinde videomen shyqqan politsei málimetti rastaǵan.
- 9 tamyzda ótken prezident sailaýynda Aleksandr Lýkashenko altynshy márte prezidenttikke sailandy dep jariialanǵaly beri elde narazylyq tolastamai tur. Sailaý kezinde daýystardyń jappai burmalanǵanyn aitqan oppozitsiia nátijeni moiyndamaitynyn málimdegen. Oppozitsiia jaqtastary sonymen birge biliktiń sherýlerdi kúshpen basyp, belsendilerdi qýdalaýyn da aiyptaǵan. Narazylardy kúshpen taratý kezinde keminde 5 adam qaza bolǵan, 6 adamnan áli kúnge deiin habar joq. Quqyq qorǵaýshylar málimetinshe, shamamen 30 myń belorýs qýdalanyp, qoqan-loqy kórgen.
- Eýroodaq pen AQSh Belarýstegi prezident sailaýynyń nátijesin moiyndamady. Eýroparlament beibit sherýdi kúshpen basýdy jáne demonstrant Roman Bondarenkonyń ólimin aiyptaityn rezoliýtsiia qabyldady. Birqatar sheneýnikterge sanktsiia salyndy.
- Resei Belarýstegi sailaý nátijesin moiyndaǵan.
