QR Ádilet ministriniń orynbasary Alma Muqanova qaita qurylǵan oblystarda máslihat depýtattary nege tikelei sailaý arqyly iriktelmegenin túsindirdi, - dep habarlaidy QazAqparat.
«Jýyqta ǵana jańadan qurylǵan oblystardyń máslihattary bólindi. Zańnama boiynsha bul protsess qalai uiymdastyryldy? Nege máslihat sailaýy bolǵan joq?» - dep surady jýrnalister.
Vitse-ministrdiń aitýyna qaraǵanda, qoldanystaǵy ákimshilik-aýmaqtyq qurylymdar týraly zańnamada máslihattardy taratý týraly normalar joq bolǵan.
«Qazir osy joq normalardyń tóńireginde jumys istep jatyrmyz. Túzetýler paketine atalǵan normalardy engizbekshimiz. Qaita qurylymdaý degen – jiyntyq uǵym. Birigýdi de, selbesýdi de, bólinýdi de qaita qurylymdaý dep túsinýge bolady. Bul jerde 3 oblystyń alty oblysqa ainalǵanyn kórip otyrmyz. Osynyń bárin retteitin tártiptiń bolmaýyna bailanysty máslihattar qazirgi quramy boiynsha bóline saldy. Ulttyq ekonomika ministrligi ondaǵy turatyn halyqtyń sany boiynsha tiisti jumys júrgizdi. Mandattardyń sany osy sanǵa sáikes belgilendi», - dedi vitse-ministr.
Aitýynsha qaita qurylymdalǵan oblystardyń máslihattary kelesi sailaýda naqtylanýy múmkin.
«Mysaly, kelesi máslihat sailaýynda Abai oblysynda qansha mandat, Shyǵys Qazaqstan oblysynda qansha mandat bolatyny aiqyndalady. Kóshi-qon máselesin eskersek, mandattar sany ózgere beredi. Biz máslihattardy qaita qurylymdaý boiynsha jumys júrgizip jatyrmyz. Sonyń nátijesinde keleside mundai suraqtar týyndamaidy. Qazirgi zańnamada oblystar qaita qurylymdalǵan jaǵdaida máslihattar qaitadan sailaý arqyly jasaqtalýy kerek pe, álde mandattar sany ózara bóliske túsýi kerek pe degen másele naqty kórsetilmegen. Osy olqylyqty joiý jumysyn júrgizip jatyrmyz», - dedi Alma Muqanova.
