"Jest dnia" Telegram-arnasynda Qazaqstan qalalarynyń birinde túsirilgen er adamdy uryp-soqqan video jariialandy. Videoda zardap shegýshi - Resei Federatsiiasynan kelgen migrant, al shabýyldaýshylar - Qazaqstan azamattary jáne janjalǵa ultaralyq alaýyzdyq sebep bolǵan dep kórsetilgen. QR IIM bul jaǵdaiǵa qatysty túsinikteme berdi, dep habarlaidy "Ult aqparat" StopFake.kz portalyna silteme jasap.
Vedomstvo málimetinshe, videonyń Qazaqstanda túsirilgenine dálel joq.
"Qazirgi ýaqytta ishki ister organdary osy video boiynsha tekserý is-sharalaryn júrgizip jatyr. Sonymen qatar politsiiaǵa ótinish túsken joq", – dep túsindirdi IIM baspasóz qyzmeti.
Bul kadrlardy Qaznet paidalanýshylary da talqylap jatyr. Mysaly, bloger Ulan Ábishev ultaralyq alaýyzdyqty qozdyrýǵa baǵyttalǵan bul videony qoiylym dep sanaidy.
"Senimsiz aqparattar men feikterdiń kóp taralýy, sondai-aq saittarǵa jasalǵan DDoS-shabýyldardyń tolastamaýy – bireýlerdiń Qazaqstanǵa qatysty aqparattyq naýqan júrgizip jatqanynyń dáleli", - dep jazdy ol óziniń Facebook paraqshasynda.
Sondai-aq, Aqparat jáne qoǵamdyq damý ministri Darhan Qydyráli de osyndai jaǵdailarǵa qatysty pikir bildirdi.
"Sońǵy kezderi ashyq arandatýshylyq baǵyttaǵy, manipýliatsiia aqparattar kóbeiip ketti. Qazaqstanda bolmaǵan oqiǵany osy jerde boldy dep kórsetý, feik aqparatty taratýdyń túpki maqsaty belgili.
Qazir elimizde ótip jatqan halyqaralyq is-sharalar men kóptegen eldiń liderleriniń kelýi, halyqaralyq deńgeidegi túrli tarihi mańyzdy sheshimderdiń qabyldanýy - Qazaqstan imidjine oń áser eteri belgili. Al álgindei jalǵan, ádeii jasalǵan aqparattyq shabýyldar ýyzdai uiyp otyrǵan ulttyń berekesin ketirý úshin ádeii jasalatyny anyq. Sondyqtan ásirese, áriptesterime áleýmettik jelidegi tekserilmegen aqparattarǵa sergek qarap, tek qana dáiekti málimetterge súienýin suraimyz", - dedi ministr jelidegi paraqshasynda.
