Foto: Aqordanyń baspasóz qyzmeti
Prezident Qasym-Jomart Toqaev Abai oblysynda shuǵyl áreket etý shtabynyń otyrysyn ótkizdi, dep habarlaidy "Ult aqparat" Aqordanyń baspasóz qyzmetine silteme jasap.
Tótenshe jaǵdailar jónindegi jedel shtabtyń otyrysy tabiǵat apaty kezinde qaza tapqan azamattardy bir minýt únsizdikpen eske alýdan bastaldy.
«Elimizde taǵy da alapat órt bolyp jatyr. Ókinishke qarai, tilsiz jaýmen kúres kezinde azamattarymyz qaitys boldy. 14 adam qyzmettik mindetin atqaryp júrip erlikpen qaza tapty. Men jańa ǵana bul adamdardyń týysqandarymen kezdestim. Óte aýyr áńgime boldy. Jurt jylap otyr. Úkimetke narazylyǵyn aityp jatyr. Marqumdardyń otbasylaryna jáne jaqyndaryna qaiǵyra kóńil aitamyn.
Qaitys bolǵan azamattardy bir minýttyq únsizdikpen eske alaiyq» - dedi Memleket basshysy.
Toqaev mundai apattar ne sebepti oryn alyp otyrǵanyn aitty.
«Alda aýqymdy jumys bar. Jalpy, bul salada túitkilder, sheshilmei jatqan máseleler az emes. Qazirgi tańda negizgi mindet – jumysty sapaly júrgizý. Bul – eń aldymen, osyndai apattarǵa jol bermeý qajet, sonymen qatar tótenshe jaǵdai bolǵan kezde tiisti sharalar joǵary deńgeide uiymdastyrylýy kerek degen sóz.
Bizdiń jaǵdaiymyzda kásibi salǵyrttyq, adamdardyń taǵdyryna múlde nemquraily qaraý baiqaldy. Qazir buǵan taǵy da kóz jetkizdim. Qazirgi tańda sapaly, durys jumys atqarylyp jatqan joq. Muny moiyndaýymyz kerek. Bir sózben aitqanda, bul salanyń jumysyn túbegeili jaqsartý qajet. Ministrlik, onyń basshylary óz qyzmettik mindetterine selqos qaraidy. Ne isteý kerek ekenin bilmeidi. Shuǵyl sheshimder qabyldamaidy. Sondyqtan osyndai apattar oryn alyp otyr» - dedi Prezident.
Sondai-aq ol keshegi kadrlyq aýys-túiis jaiynda da sóz qozǵady.
«Ózderińiz bilesizder, men keshe Tótenshe jaǵdailar ministrin aýystyrý týraly sheshim qabyldadym. Jańa ministrdi taǵaiyndadym. General-maior Syrym Dúisenǵazyuly Sháriphanov jumysqa kiristi. Tótenshe jaǵdai salasynda tájiribesi, tiisti bilimi bar», - dedi Toqaev.
