Mektepke smartfon ákelýge tyiym salǵynǵany ras pa? Bul suraqqa Ortalyq kommýnikatsiialar qyzmetinde ótken baspasóz máslihatynda QR Bilim jáne ǵylym vitse-ministri Sholpan Karinova jaýap berdi, dep habarlaidy QazAqparat tilshisi.
«Áleýmettik jelilerde mektepterde telefondy paidalanýǵa tyiym salynatyny týraly aqparat tarap júr. Bul shyndyqqa janaspaidy. Iaǵni smartfonǵa qatysty burynǵy norma saqtalady. Alaida mektepter ózdigimen smartfondardy paidalanýǵa shekteý qoiýǵa qatysty sheshim qabyldai alady. Óz jarǵysyna sáikes, mundai sheshim qabyldaýǵa múmkindik bar», - dedi Sholpan Karinova.
Onyń aitýynsha mektepke smartfondy ákelýge qoiylatyn tyiym máselesi burynnan beri talqylanýda.
«Ártúrli paiym-pikir bar. Túpkilikti sheshim qabyldaý úshin atalmysh máseleni zertteitin bolamyz. Álbette bilim alýda telefon birtalai kedergi keltiretinin atap ótý kerek», - dedi vitse-ministr.
Karinova uialy telefondar men gadjetterge tyiym salýǵa qatysty áńgimeniń qaidan shyqqanyn da túsindirdi.
"Bir buiryqtyń jobasy qoǵamdyq talqylaýǵa shyǵaryldy. Ondai qujattar ylǵi jariialanady. Negizgi maqsat – qoǵamnyń pikirin bilý. Sondai-aq, áriptesterimiz – pedagogtar da óz ustanymyn aita alady. Al buiryqtyń jobasy talqylaýdan alynǵannan keiin portalǵa túsken usynystar men eskertýlerdiń negizinde mindetti túrde túzetý engiziledi", - deidi vitse-ministr.
