QR IIM Ishki jáne syrtqy kommýnikatsiialar departamentiniń direktory Almas Sadýbaev Qaraǵandydaǵy tóbelestiń sebebin aitty, dep habarlaidy QazAqparat.
«Qaraǵandydaǵy «Ejelgi Rim» meiramhanasyndaǵy oqiǵaǵa toqtalsaq, 31 jeltoqsannan 1 qańtarǵa qaraǵan túnde, iaǵni saǵat 4 kezinde qonaqtar mýzykany óshirmeý týraly talap qoiǵan. Sol sebepten aralarynda (meiramhana ielerimen) eregis bastalyp ketken. Osydan keiin olar (qonaqtar) dalaǵa shyǵyp, óz dostaryna habarlasyp, sol jerge basqa da azamattardy shaqyrǵan. Qaza tapqan adam atalǵan meiramhanada otyrmaǵan, iaǵni syrttan kelgen. Aradaǵy janjaldyń saldarynan tóbeles bolyp, jaralanǵan tórt adamnyń biri kóz jumdy», - dedi A. Sadýbaev Ortalyq kommýnikatsiialar qyzmetinde.
Osy oraida A. Sadýbaev bul máselede eshqandai ultaralyq qaqtyǵys joq ekenin atap ótti.
«Osyǵan deiin aqparat bergen bolatynbyz. Qazirgi kezde 8 adam qamaýda otyr. Bul máselede kináliler jazaǵa tartylatyn bolady, óitkeni qylmys jasaǵannyń bári birdei. Oqiǵanyń mán-jaiy tergeý amaldary kezinde anyqtalady», - dedi A. Sadýbaev.
Budan buryn habarlanǵandai, Qaraǵandydaǵy kisi ólimine qatysty 8 kúdikti tutqyndaldy.
