Foto: Mariia Karimova/«Gazeta.Ru»
Syrtqy ister ministrligi Izrailde júrgen Qazaqstan azamattarynyń sanyn jariialady, habarlaidy "Ult aqparat".
Ministrliktiń resmi ókili Aibek Smadiiarovtyń aitýynsha, qazirgi kezde Izrailde 77 adam konsýldyq tirkeýde tur. Olardyń ishinde elshilik qyzmetkerleri men otbasy músheleri de bar.
"7 qazanda Izraildegi áskeri-saiasi jaǵdaidyń shielenisýine bailanysty Qazaqstan Respýblikasynyń Syrtqy ister ministrliginde jedel shtab qurylyp, sheteldegi tótenshe jaǵdailar kezindegi is-qimyl algoritmin dereý oryndaýǵa kiristi.
Syrtqy ister ministrliginde jáne Qazaqstannyń Tel-Avivtegi Elshiliginde Izrail aýmaǵyndaǵy QR azamattary men olardyń elimizdegi týystary úshin shuǵyl bailanys jedel jelisi ashyldy.
Osy eki kún ishinde otandastarymyzdan 500-den astam qońyraý men suraýlar kelip túsip, olarǵa jaýap berildi. Búgingi tańda Izraildegi elshiliktiń konsýldyq esebine 77 azamat tirkelgen (elshilik qyzmetkerleri men olardyń otbasy múshelerin qosa alǵanda - esk.). Izraildiń joǵary oqý oryndarynda 5 qazaqstandyq stýdent oqidy, sondai-aq 30-ǵa jýyq qazaqstandyq jergilikti meditsinalyq mekemelerde taǵylymdamadan ótip júr. Barlyǵy - 112 adam" - dedi Smadiiarov.
Onyń aitýynsha, Tel-Avivtegi diplomattarymyz Izraildegi Qazaqstan azamattarymen turaqty bailanysta bolyp, ózara jedel is-qimyl jasaý maqsatynda messendjerde arnaiy chat qurǵan. Qazirgi ýaqytta oǵan Izrailde ýaqytsha jáne turaqty turatyn 200-ge jýyq QR azamaty qosylǵan.
"Bul chatta bizdiń otandastarymyz ózderiniń ornalasqan jeri týraly habarlap, diplomattarmen tikelei bailanys ornatty. Al diplomattar óz kezeginde azamattarymyzǵa ártúrli máseleler boiynsha keńes berip, tiisti konsýldyq-quqyqtyq kómek kórsetip jatyr.
Izraildegi barlyq azamatymyz sabyrlyq saqtap, diplomattarǵa qajetti aqparatty usynýǵa barynsha járdemdesip jatyr jáne jergilikti bilik organdarynyń barlyq talaby men qaýipsizdik sharalaryn qatań saqtap keledi.
Búgingi tańda bizge Izrailde qaza bolǵan, zardap shekken jáne kepilge alynǵan qazaqstandyqtar týraly aqparat kelip túsken joq" - dedi resmi ókil.
Qazaqstannyń Tel-Avivtegi Elshiliginiń boljamy boiynsha, Izrailde konsýldyq esepke turmaǵan 400-den astam Qazaqstan azamaty bolýy múmkin.
