videodan alynǵan kadr
Qorǵanys ministrligi Parlament Májilisiniń depýtaty Dáýlet Turlyhanovtyń ulynyń áskeri bólimnen qashyp ketkeni týraly aqparatty rastady, dep habarlaidy "Ult aqparat".
"2 shildede Qonaev garnizonynyń áskeri bólimderiniń birinde merzimdi qyzmetin ótkerip jatqan qatardaǵy jaýynger B. qamaýǵa alý merzimi aiaqtalǵannan keiin (buiryqqa baǵynbaý nemese ony ózgedei oryndamaǵany úshin gaýptvahtada ustaý túrinde ákimshilik jaýapkershilikke tartyldy) áskeri qyzmetshiniń súiemeldeýimen áskeri bólimniń ornalasqan jerine qaityp bara jatqan kezinde belgisiz baǵytqa qashyp ketken" - delingen ministrlik habarlamasynda.
Vedomstvo málimetinshe, áskeri qyzmetshiniń ornalasqan jerin anyqtaý boiynsha izdestirý is-sharalary uiymdastyryldy. Atalǵan derekke qatysty qyzmettik tekseris taǵaiyndalǵan.
Aita keteiik, buǵan deiin depýtattyń ulynyń áskeri bólimnen qashyp ketkenin zańger Anna Chernova habarlaǵan bolatyn.
"Maǵan Májilis depýtaty Dáýlet Turlyhanovtyń uly Nurasyl Bolattyń áskeri bólimnen qashyp ketkeni belgili boldy. Oǵan áskeri bólim basshysynyń baqylaýynda bolsyn degen bultartpaý sharasy taǵaiyndalǵan. Biraq ony kesheden beri taba almai jatyr. BMW kóligine otyryp, ketip qalypty. Bala tergeýde ekenin umytyp ketken siiaqty. Ony kórgender bolsa, aityńyzdarshy", - dep jazdy ol Instagram-daǵy paraqshasynda.
Eske salaiyq, biyl aqpanda Almatyda zańger Anna Chernova men onyń kúieýi Oleg Chernov soqqyǵa jyǵylǵan edi.
Almaty qalalyq Politsiia departamenti atalǵan derek QR QK-niń 293-baby («Buzaqylyq») boiynsha sotqa deiingi tergeýdiń biryńǵai tizilimine tirkelgenin habarlady.
Keiin erli-zaiyptylardy urǵan adam Májilis depýtaty Dáýlet Turlyhanovtyń uly Nurasyl Bolat ekeni anyqtalǵan.
