Qorǵanys jáne aeroǵarysh ónerkásibi vitse-ministri Marat Nurǵojin Baiqońyrdaǵy zymyran apatyna qatysty túsinikteme berdi, dep habarlaidy Sputnik Qazaqstan tilshisi.
Onyń aitýynsha, zymyran bólshekteri qulaǵan aýmaqta radiatsiialyq fon turaqty.
"Otynnyń negizgi bóligi 47 shaqyrym biiktikte jandy. Boljammen 22 tonna kerosin men ottegi jerge tógildi. Kerosin ýytty zattardyń tórtinshi sanatyna jatady, sondyqtan, meniń oiymsha, ol sonshalyqty úlken qaýip tóndirmeidi. Zymyran tasyǵyshtyń bólshekteri qulaǵan aýmaqta radiatsiialyq fon turaqty, sarapshylar barlyq synamany aldy", — dedi Nurgojin úkimet kýlýarynda.
Ol qazir ekologiialyq ziian taldaýyn júrgizý josparlanyp otyrǵanyn atap ótti.
"Ekologiiaǵa qanshalyqty ziian kelgeni komissiianyń jumysynan keiin anyqtalady. Baǵalaýǵa energetika ministrligi jaýapty. "Qazǵaryshtyń" qoldaýymen bul jumystardyń barlyǵy belgilengen tártipte júrgiziledi", — dedi vitse-ministr.
Tehnikalyq sebepter anyqtalǵanǵa deiin "Soiýz" zymyrandaryn ushyrý ýaqytsha toqtatylǵan.
"Jyl sońyna deiin taǵy úsh ǵarysh kemesin ushyrý josparlanyp otyr: basqarylatyn, kólik kemesi tielgen jáne ǵarysh apparaty bar. Olardy ushyrý-ushyrmaý "Roskosmos" tehnikalyq komissiiasynyń apat sebepterin anyqtaý boiynsha jumysynan keiin sheshiledi. Biz bul jumystar úsh apta ishinde aiaqtalady dep kútip otyrmyz", — dedi Nurǵojin.
Eske sala ketsek, 11 qazan kúni Baiqońyrda "Soiýz-FG" zymyran-tasyǵyshy "Soiýz MS-10" ǵarysh kemesin orbitaǵa shyǵara almady. Zymyran-tasyǵysh apatqa ushyrap, ǵaryshkerler otyrǵan kapsýla kemeden avtomatty túrde ajyratyldy. Ekipaj músheleri — reseilik ǵaryshker Aleksei Ovchinin men amerikalyq astronavt Nik Heig aman.
Ǵaryshkerler otyrǵan kapsýla Jezqazǵan qalasynan 25 kilometr qashyqtyqta túsken.
