Qazaqstanda "Altyn belgi" alý talaptary qatańdatylady. Bul týraly «Bilim jáne ǵylym – eldiń turaqty damýynyń kepili» taqyrybyndaǵy pedagogterdiń Respýblikalyq tamyz konferentsiiasynyń plenarlyq sessiiasynda QR Bilim jáne ǵylym ministri Ashat Aimaǵambetov málim etti, dep habarlaidy "Ult aqparat".
«Kelesi oqý jylynan bastap «Altyn belgige» úmitkerler úshin talaptar ary qarai kúsheitiledi. Biz ony kezeń-kezeńmen jyl saiyn ózgertip jatyrmyz. Ótken jyldary bul máseleni kóterip, biraz ózgeris engizdik. Biyl endi ekinshi kezeń qamtylady. Ekinshi kezeń degenimiz - jyldyq «bes» baǵasymen qatar, úmitkerlerdiń 5-11 synyp aralyǵyndaǵy barlyq toqsandyq baǵalary da «5» bolýy kerek degen qaǵida engiziledi. Ony óte mańyzdy qaǵida dep sanaimyn. Sondyqtan osy sheshimdi de qabyldap otyrmyz», - dedi Aimaǵambetov.
Onyń aitýynsha, túlekter úshin emtihandy táýelsiz uiym ótkizetin bolady.
«Bul reforma oń nájesin beredi dep senemin», - dedi ministr.
"Altyn belgi" – qazaqstandyq bilim berý júiesinde ozat oqýshyǵa beriletin tós belgi.
