Ǵylym jáne joǵary bilim ministri Saiasat Nurbek Qazaqstandaǵy joǵary bilimniń qymbat bolý sebebi ne degen suraqqa jaýap berdi, - dep habarlaidy Tengrinews.kz agenttigi.
"Siz joǵary bilimdi qoljetimdi dep sanaisyz ba? Qazir Almatydaǵy memlekettik ýniversitetterdegi bakalavriat baǵasy shamamen 1,5 million teńge", - dep surady jýrnalist Ortalyq kommýnikatsiialar qyzmetinde ótken brifingte.
Saiasat Nurbek qazir Qazaqstanda demografiialyq tolqyn baiqalatynyn atap ótti. Elimizde eki jyl qatarynan rekordtyq bala dúniege keldi. Bul úlken qysym jasap, aldaǵy 5-7 jylda másele týǵyzatynyn aitady.
"Biyl biz sońǵy 30 jylda bolmaǵan rekordtyq grant bóldik - 88 myń. Bul ótken jylmen salystyrǵanda 19 paiyzǵa kóp. Biraq granttar sanynyń jyl saiyn artýy da ósip kele jatqan halyqtyń joǵary bilimge qol jetkizýine áli de múmkindik bermeidi", - dep túsindirdi ministr.
Máseleni sheshý úshin elde jańa ishinara granttyq baǵdarlama engizilip jatyr. Nurbek túsindirgendei, qazir bul máseleni arnaiy jumys toby qarap jatyr.
Onyń aitýynsha, el stýdenttik nesieni 2-3 paiyzben qaitara alady. Mehanizmdi kelesi oqý jylynda engizý josparlanýyp otyr.
"Bilimniń qunyna keletin bolsaq. Ókinishke orai, grant quny bizdiń ýniversitetterdiń damýyna, infraqurylymǵa, zerthanalarǵa investitsiia salýǵa, myqty professorlardy tartýǵa múmkindik bermeidi degen maǵynada joǵary emes. Sondyqtan biz óńirlik ýniversitetterdi qalai damyta alamyz, olarǵa akademiialyq infraqurylymdy damytýǵa, jańa oqý korpýs, jataqhanalar salýǵa, kadrlardy qalyptastyrýǵa múmkindik beremiz degen suraqtardy muqiiat oilastyryp jatyrmyz", - dedi ministr.
Ol kelesi jyly elimizde akademiialyq sheberlik ortalyqtaryn damytý boiynsha aýqymdy baǵdarlama iske qosylatynyn jáne bul joǵary bilim berý sapasyn arttyratynyn túsindirdi.
