Eńbek jáne halyqty áleýmettik qorǵaý ministri Berdibek Saparbaev ataýly áleýmettik kómek birinshi toqsanda ǵana emes, jyl boiy tólenetinin aitty, dep habarlaidy Sputnik Qazaqstan tilshisi.
"Áleýmettik jelilerde keibireýler ataýly áleýmettik kómek tek birinshi toqsanda ǵana tólenedi, odan keiin tólenbeidi dep jazyp jatyr. Men qaitalap aitamyn, ol jyl boiy tólenedi. Biraq, óziniń erejesine sáikes, toqsan saiyn otbasynyń tabysy naqtylanyp turady", - dedi Saparbaev úkimet úiinde ótken baspasóz máslihatynda.
Ministrdiń aitýynsha, qazirgi tańda 160 myń otbasyǵa ataýly áleýmettik kómek taǵaiyndalǵan, bul shamamen 800 myńnan astam adam.
"10 myń otbasyǵa taǵaiyndalǵan joq, sebebi olardyń tabysy belgilengen kriteriiden asyp ketti", - dedi ol.
Vedomstvo basshysy sáýir men mamyr ailaryna 23 milliard teńge bólingenin atap ótti.
"Jalpy jyl boiyna ataýly áleýmettik kómekti tóleý úshin 130 milliard teńge qarastyrylǵan. Orta eseppen árbir otbasyna 105 myń teńge ataýly áleýmettik kómek kórsetiledi", - dedi Saparbaev.
Ministr bul jumys ári qarai jalǵasyn tabatynyna sendirdi.
Sondai-aq, Saparbaev ataýly áleýmettik kómekti taǵaiyndaǵan kezde kiris retinde ne sanalyp-sanalmaitynyn túsindirip ótti.
"Ataýly áleýmettik kómekke qatysty túsinbeýshilik tabysty esepteýden boldy. Ásirese, otbasynyń malyna, egini men jihazyna bailanysty. Jihazdy eseptemeý kerek. Biz úi-úidi aralamańdar degen tapsyrma berdik, sebebi aýyldan bastap ár qalada árbir otbasynyń kirisi men shyǵysyna qatysty málimetter bar. Eger suraq týyndaǵan jaǵdaida ǵana, komissiiaǵa sol otbasynyń úiine baryp, jaǵdaidy óz kózimen kórip qaitýyna bolady", - dedi Saparbaev úkimet úiinde ótken baspasóz máslihatynda.
Jihazdan bólek, ministrdiń aitýynsha, taýyq pen jumyrtqa da kiris retinde eseptelmeidi.
"Úiine baryp, eshkim tońazytqyshyn asha almaidy. Almasy, shiesi, qulpynaiy, basqasy bar, jemis-jidek, kókónis – munyń barlyǵy eseptelmeidi", - dedi ministr.
Saparbaev halyqty masyldyqqa emes, eńbek etýge úiretý kerek ekenin atap ótti.
"Keibireýler myna alyp jatqan tabystyń eshqaisysyn eseptemeý kerek degen usynys aitady. Olai bolmaidy, masyldyq bolmaýy kerek. Tabysty biz mindetti túrde esepteýimiz kerek... Biz kishkentai baladan bastap úlken kisige deiin eńbek etýge úiretýimiz kerek. Áitpese bolmaidy", - degen vedomstvo basshysy biliktiń mindeti azamattarǵa jumys isteýge jaǵdai jasaý ekenin aitty.
