Boljammen bes-alty jyldan keiin Qazaqstanda neke qiiatyndar sany eń joǵary shekke jetedi. Bul týraly ulttyq ekonomika ministri Rýslan Dálenov aitty, dep habarlaidy Sputnik Qazaqstan.
Halyqqa esep berý kezdesýinde elordalyq turǵyn ministrden zamandastary arasynda shańyraq kótergender az ekenin aityp, "nekelesý sanynyń azaiýy eldiń ekonomikalyq jaǵdaiymen bailanysty ma?" dep surady.
Mundai suraqty kútpegen bolýy kerek, ministr Dálenov te, zalda otyrǵan qonaqtar da bir kúlip aldy.
"Ekonomist retinde, men úshin barlyǵy ekonomikamen bailanysty. BAQ betinde sońǵy kezde ajyrasatyndar qatary artyp barady degen másele jii kóterilgen soń, taiaýda men statistikany qarap shyqtym. Bizde jyl saiyn 140 myń adam nekesin qiiady eken, biraq, ókinishke qarai, 55 myńy ajyrasady", - dedi ministr.
Ol qazirgi tańda jastar arasynda nekelesý sanynyń azaiýy 90-shy jyldardaǵy demografiiamen bailanysty ekenin aitty.
"Toqsanynshy jyldary dúniege kelgender qazir otbasyn quratyn jasqa jetip qaldy. Biraq olardyń sany kóp emes, sondyqtan nekelesýdiń tómendeýi osymen bailanysty", - dedi Dálenov.
Ministr boljammen bes-alty jyldan keiin nekelesetinder sany 2015 jylǵy kórsetkishten asyp túsetinin jetkizdi. Osydan tórt jyl buryn elimizde 150 myń neke qiylǵan eken.
Osy oraida Dálenov turmys qurmaǵan qyzdarǵa qyzyqty statistikany mysalǵa keltirdi.
"Qyzyq úshin aitaiyn, ásirese jas qyzdarǵa qajet bolar. Eger neke qiiý dinamikasyn qarasaq, qazan aiynda otaý quratyndar kóp eken, shamamen 13,5 myń neke qiylǵan. Al eń qolaisyz mezgil – aqpan aiy, 8,5 myń neke. Mine, osyndai qyzyq statistika", - dedi vedomstvo basshysy.
