بولجاممەن بەس-التى جىلدان كەيٸن قازاقستاندا نەكە قيياتىندار سانى ەڭ جوعارى شەككە جەتەدٸ. بۇل تۋرالى ۇلتتىق ەكونوميكا مينيسترٸ رۋسلان دەلەنوۆ ايتتى, دەپ حابارلايدى Sputnik قازاقستان.
حالىققا ەسەپ بەرۋ كەزدەسۋٸندە ەلوردالىق تۇرعىن مينيستردەن زامانداستارى اراسىندا شاڭىراق كٶتەرگەندەر از ەكەنٸن ايتىپ, "نەكەلەسۋ سانىنىڭ ازايۋى ەلدٸڭ ەكونوميكالىق جاعدايىمەن بايلانىستى ما?" دەپ سۇرادى.
مۇنداي سۇراقتى كٷتپەگەن بولۋى كەرەك, مينيستر دەلەنوۆ تە, زالدا وتىرعان قوناقتار دا بٸر كٷلٸپ الدى.
"ەكونوميست رەتٸندە, مەن ٷشٸن بارلىعى ەكونوميكامەن بايلانىستى. باق بەتٸندە سوڭعى كەزدە اجىراساتىندار قاتارى ارتىپ بارادى دەگەن مەسەلە جيٸ كٶتەرٸلگەن سوڭ, تاياۋدا مەن ستاتيستيكانى قاراپ شىقتىم. بٸزدە جىل سايىن 140 مىڭ ادام نەكەسٸن قييادى ەكەن, بٸراق, ٶكٸنٸشكە قاراي, 55 مىڭى اجىراسادى", - دەدٸ مينيستر.
ول قازٸرگٸ تاڭدا جاستار اراسىندا نەكەلەسۋ سانىنىڭ ازايۋى 90-شى جىلدارداعى دەموگرافييامەن بايلانىستى ەكەنٸن ايتتى.
"توقسانىنشى جىلدارى دٷنيەگە كەلگەندەر قازٸر وتباسىن قۇراتىن جاسقا جەتٸپ قالدى. بٸراق ولاردىڭ سانى كٶپ ەمەس, سوندىقتان نەكەلەسۋدٸڭ تٶمەندەۋٸ وسىمەن بايلانىستى", - دەدٸ دەلەنوۆ.
مينيستر بولجاممەن بەس-التى جىلدان كەيٸن نەكەلەسەتٸندەر سانى 2015 جىلعى كٶرسەتكٸشتەن اسىپ تٷسەتٸنٸن جەتكٸزدٸ. وسىدان تٶرت جىل بۇرىن ەلٸمٸزدە 150 مىڭ نەكە قيىلعان ەكەن.
وسى ورايدا دەلەنوۆ تۇرمىس قۇرماعان قىزدارعا قىزىقتى ستاتيستيكانى مىسالعا كەلتٸردٸ.
"قىزىق ٷشٸن ايتايىن, ەسٸرەسە جاس قىزدارعا قاجەت بولار. ەگەر نەكە قييۋ ديناميكاسىن قاراساق, قازان ايىندا وتاۋ قۇراتىندار كٶپ ەكەن, شامامەن 13,5 مىڭ نەكە قيىلعان. ال ەڭ قولايسىز مەزگٸل – اقپان ايى, 8,5 مىڭ نەكە. مٸنە, وسىنداي قىزىق ستاتيستيكا", - دەدٸ ۆەدومستۆو باسشىسى.
