Densaýlyq saqtaý ministri Aleksei Tsoi mereke kúnderi qarsańynda qazaqstandyqtarǵa úndeý jasady, dep habarlaidy "Ult aqparat".
«Merekelik demalys kúnderi qarsańynda taǵy da esterińizge sala ketkim keledi. Kúz ben kóktemde jiti respiratorlyq virýsty infektsiia (rinovirýs, adenovirýs, paragripp virýs jáne basqalary) asqynady. Qazir JRVI maýsymy jalǵasýda, sondyqtan syrqattaný qaýpi seiilgen joq. Qyrkúiek pen qańtar aralyǵynda elimizde taralǵan KVI virýsyn genomdyq zertteý nátijesi boiynsha koronavirýstyń («britandyq», «Ońtústik Afrika», «Braziliialyq») jańa shtamy anyqtalǵan joq. Alaida, halyqaralyq áýe qatynasy qaita ashylǵanyn, shetelge shyǵatyn el azamattary (eńbek kóshi-qony, oqytý, emdeý, týrizm), sondai-aq jaqyn jáne alys shetelderden kelgenderdiń qatary kóbeigenin eskergen jón. Iaǵni, koronavirýs infektsiiasynyń jańa shtamdaryn tasymaldaý qaýpi de artady degen sóz», - dep jazdy Aleksei Tsoi Facebook-tegi paraqshasynda.
Ministrdiń aitýynsha, áleýmettik-ekonomikalyq nysandardaǵy shekteý sharalarynyń jeńildetilýi, halyqtyń belsendiligi (áleýmettik ara qashyq, maska taǵý rejimi jáne t.b. saqtalmaidy) koronavirýs infektsiiasynyń taralý qaýpin údetýi múmkin.
«Amerikalyq jáne reseilik ǵalymdardyń ǵylymi zertteýlerine sáikes, koronavirýs infektsiiasymen aýyratyndardyń tek 10-15 paiyzynda turaqty immýnitet qalyptasqan.
COVID-19 juqtyrǵan naýqastarda immýnitet patsienttiń jasyna qarai qalyptasady: immýnitet balalarda jaqsy damidy - kámeletke tolmaǵandar arasynda immýnitet shamamen 20% bolady. 18-den asqan adamdarda -14%, 65 jastan asqandarda -11%. 40%-da immýnitet óte álsiz jáne infektsiia qaitalanǵanda kómektese almaidy.
Immýnitettiń saqtalý uzaqtyǵyna qatysty ǵylymi dáleldengen derek joq, sondyqtan Covid-19-dan saýyqqan adamdarda aýrýdy qaita juqtyrý múmkindigi kún saiyn artyp keledi.
Aita ketý kerek, karantinge koronavirýs infektsiiasyna qarsy vaktsinatsiia ǵana balama bola alady», - dedi densaýlyq ministri.
Onyń aitýynsha, 2021 jyldyń 1 aqpanynan elimizde KVI-ge qarsy «Spýtnik V» ekpesimen vaktsinatsiia bastalǵan.
«Vaktsinatsiia kezeń-kezeńimen júzege asyrylady.
Birinshi kezekte, koronavirýs infektsiiasyn juqtyrý jáne taratý qaýpi joǵary azamattar (meditsina qyzmetkerleri, pedagogtar, kúsh qurylymdarynyń qyzmetkerleri) ekpe saldyrady.
Sáýir aiynan halyqtyń osal toptaryn (sozylmaly aýrýlary bar adamdar, 65 jastan asqandar jáne halyqtyń basqa da toptary) vaktsinatsiialaý josparlanýda.
Eger halyq jappai KVI-ge qarsy profilaktikalyq ekpe saldyrsa, ujymdyq immýnitet qalyptasady jáne infektsiianyń taralýyn toqtatýǵa múmkindik týady», - dedi ol.
Ministri halyqtan saqtyq sharalaryn saqtaýdy, adam kóp jinalatyn oryndarǵa barmaýǵa shaqyrdy.
«Qurmetti qazaqstandyqtar, koronavirýs infektsiiasyn juqtyrý qaýpi áli de joǵary! Ózińizdiń jáne jaqyndaryńyzdyń densaýlyǵyn qorǵaý úshin mynadai saqtyq sharalaryn saqtaýdy suraimyn:
- adam kóp jinalatyn oryndarǵa barmańyzdar;
- ujymdyq is-shara, mereitoi, korporativtik jiyn jasaýǵa bolmaidy;
- aǵzańyzǵa sýyq tigizip almaýǵa tyrysyńyz;
- ózgelerge qaýip tóndirmeý úshin jaqyndaryńyzben alystan aralasyńyzdar, zamanaýi bailanys quraldarymen habarlasqan durys.
Pandemiia áli de jalǵasýda, virýs jeńilgen joq, sondyqtan ár adam jaǵdaiǵa barynsha jaýapkershilikpen qaraý kerek. Ózgelerge aýrý juqtyrmaýdyń jolyn izdegen durys, maska kiip, áleýmettik araqashyqty jáne gigiena talaptaryn saqtaýǵa shaqyramyn. Árine, mindetti túrde vaktsinatsiia da qajet», - dedi ministr.
