Qazaqstan ádilet ministri Marat Beketaev Briýsselde Qazaqstan Ulttyq qorynyń sot buǵattaǵan 22 milliard dollar aktivin buǵattan shyǵarý, ia shyǵarmaý máselesi qaralyp jatqanyn habarlady, dep jazady Azattyq.
Astanada májilistegi jiynǵa qatysqan soń jýrnalister saýalyna jaýap bergen Beketaev sońǵy sot otyrysy ótken jumada ótkenin, sot Ulttyq qor aktivine qatysty máseleni áli sheshpegenin aitty.
"22 milliard dollar tutas buǵatta qalady degenge kúmánim bar. Jeke óz basym barlyq soma buǵattan shyǵarylady dep úmittenem. Eger ishinara buǵattan bosatylǵannyń ózinde, ol aqsha Statilerdiń esebine aýdarylady degen sóz emes. Bul - qarjy Belgiiadaǵy sot túpkilikti aiaqtalǵanǵa deiin buǵatta bolady degen sóz" dedi Marat Beketaev.
Onyń sózinshe, álemdik tájiribede sýverendi qarjy men ulttyq bankterdiń qarjysy buǵattalmaidy.
Byltyr jeltoqsanda New York Mellon banki moldovalyq biznesmen Anatol Statidiń Qazaqstan úkimetine qarsy aryzy boiynsha Qazaqstan Ulttyq qorynyń 22 milliard dollar qarjysyn buǵattaǵany jariia bolǵan.
Keiin Astana AQSh bankiniń Ulttyq qor aktivin buǵattaǵanyna narazylyq bildirip, Angliia Joǵarǵy sotyna talap-aryz túsirgen.
Qańtar aiynda Qazaqstan biligi Niderland soty Qazaqstan Ulttyq bankiniń "Ulttyq qordyń New York Mellon bankine kastodialdy saqtaýǵa salynǵan aktivin buǵattan bosatý týraly" talap-aryzyn qanaǵattandyrǵanyn habarlaǵan.
Qazaqstannyń munai-gaz salasyna investitsiia salǵan Stati memlekettik organdar ózin "investitsiiasyn tym arzanǵa satýǵa májbúrleý úshin qyspaqqa alǵanyn" aitady. Astana bul aiyptaýdy teristep, Statidi "alaiaqtyq jasady" dep aiyptaidy. Ádilet ministrliginiń habrlamasynda Qazaqstannyń buǵan deiin Statige qarsy aryz túsirgeni aitylady.
