قازاقستان ەدٸلەت مينيسترٸ مارات بەكەتاەۆ بريۋسسەلدە قازاقستان ۇلتتىق قورىنىڭ سوت بۇعاتتاعان 22 ميلليارد دوللار اكتيۆٸن بۇعاتتان شىعارۋ, يا شىعارماۋ مەسەلەسٸ قارالىپ جاتقانىن حابارلادى, دەپ جازادى ازاتتىق.
استانادا مەجٸلٸستەگٸ جيىنعا قاتىسقان سوڭ جۋرناليستەر ساۋالىنا جاۋاپ بەرگەن بەكەتاەۆ سوڭعى سوت وتىرىسى ٶتكەن جۇمادا ٶتكەنٸن, سوت ۇلتتىق قور اكتيۆٸنە قاتىستى مەسەلەنٸ ەلٸ شەشپەگەنٸن ايتتى.
"22 ميلليارد دوللار تۇتاس بۇعاتتا قالادى دەگەنگە كٷمەنٸم بار. جەكە ٶز باسىم بارلىق سوما بۇعاتتان شىعارىلادى دەپ ٷمٸتتەنەم. ەگەر ٸشٸنارا بۇعاتتان بوساتىلعاننىڭ ٶزٸندە, ول اقشا ستاتيلەردٸڭ ەسەبٸنە اۋدارىلادى دەگەن سٶز ەمەس. بۇل - قارجى بەلگيياداعى سوت تٷپكٸلٸكتٸ اياقتالعانعا دەيٸن بۇعاتتا بولادى دەگەن سٶز" دەدٸ مارات بەكەتاەۆ.
ونىڭ سٶزٸنشە, ەلەمدٸك تەجٸريبەدە سۋۆەرەندٸ قارجى مەن ۇلتتىق بانكتەردٸڭ قارجىسى بۇعاتتالمايدى.
بىلتىر جەلتوقساندا New York Mellon بانكٸ مولدوۆالىق بيزنەسمەن اناتول ستاتيدٸڭ قازاقستان ٷكٸمەتٸنە قارسى ارىزى بويىنشا قازاقستان ۇلتتىق قورىنىڭ 22 ميلليارد دوللار قارجىسىن بۇعاتتاعانى جارييا بولعان.
كەيٸن استانا اقش بانكٸنٸڭ ۇلتتىق قور اكتيۆٸن بۇعاتتاعانىنا نارازىلىق بٸلدٸرٸپ, انگلييا جوعارعى سوتىنا تالاپ-ارىز تٷسٸرگەن.
قاڭتار ايىندا قازاقستان بيلٸگٸ نيدەرلاند سوتى قازاقستان ۇلتتىق بانكٸنٸڭ "ۇلتتىق قوردىڭ New York Mellon بانكٸنە كاستوديالدى ساقتاۋعا سالىنعان اكتيۆٸن بۇعاتتان بوساتۋ تۋرالى" تالاپ-ارىزىن قاناعاتتاندىرعانىن حابارلاعان.
قازاقستاننىڭ مۇناي-گاز سالاسىنا ينۆەستيتسييا سالعان ستاتي مەملەكەتتٸك ورگاندار ٶزٸن "ينۆەستيتسيياسىن تىم ارزانعا ساتۋعا مەجبٷرلەۋ ٷشٸن قىسپاققا العانىن" ايتادى. استانا بۇل ايىپتاۋدى تەرٸستەپ, ستاتيدٸ "الاياقتىق جاسادى" دەپ ايىپتايدى. ەدٸلەت مينيسترلٸگٸنٸڭ حابرلاماسىندا قازاقستاننىڭ بۇعان دەيٸن ستاتيگە قارسى ارىز تٷسٸرگەنٸ ايتىلادى.
