Astanada bastalatyn Siriia beibit kelissóziniń kezekti besinshi kezdesýinde Siriiada tórt deeskalatsiia aimaǵyn qurý týraly memorandýmdy iske asyrý joldary talqylanady, - dep málimdedi Qazaqstan syrtqy ister ministri Qairat Abdrahmanov. Kelissóz Rixos President Astana qonaqúiinde ótedi.
Astanada jýrnalisterge suhbat bergen Abdrahmanov kelissóz negizinen garant elder Resei, Túrkiia jáne Iran arasynda ótip jatqanyn aitty. Kelissózge Resei biliginiń joǵary shendi ókilderi, Túrkiia, Iran syrtqy ister ministrleriniń orynbasarlary, Siriia úkimetiniń delegatsiiasy, Siriia qarýly oppozitsiiasy delegatsiiasynyń toǵyz ókili kelgen.
"Bul memorandýmdy iske asyrýda deeskalatsiia zonalarynyń shekarasyn aiqyndaý, zonalardyń qyzmet etýin baqylaý, olardyń shekaralarynda qadaǵalaý-ótkizý beketterin ornatý máselelerin talqylaý óte mańyzdy" dedi Abdrahmanov. Onyń sózinshe, garant elder sonymen qatar Siriia territoriiasyndaǵy IýNESKO qorǵaýyna alynǵan tarihi, mádeni nysandardy minadan tazartý máselelerdi de talqylamaq.
Abdrahmanovtyń aitýyna qaraǵanda, Reseidiń Siriiadaǵy qaqtyǵysty toqtatý rejimin baqylaý ortalyǵynyń málimetinshe, Siriiadaǵy atysty toqtatý rejimine 65-ke jýyq oppozitsiialyq qarýly toptar qosylǵan.
Besinshi kezdesý bastapqyda 12–13 maýsymǵa belgilenńp, biraq keiinge shegerilgen. Osyǵan deiingi kezdesýde garant elder - Resei, Túrkiia jáne Iran Siriiada tórt qaýipsizdik aimaǵyn qurý jóninde memorandým jasaǵan. Biraq oppozitsiia Reseidiń bul josparynan bas tartqan.
Siriiadaǵy janjalda Iran men Resei Siriia prezidenti Bashar Asadty qoldaidy. Al Túrkiia keibir qarýly kóterilisshilerdi jaqtaidy.
