Qazaqstan qarjy ministri Baqyt Sultanov Reseige salynǵan sanktsiialardyń Qazaqstanǵa "tikelei áseri joǵyn" aitty. Onyń sózinshe, kerisinshe osyndai kezde qazaqstandyq taýar óndirýshilerdiń Resei naryǵyna shyǵýyna múmkindik týady.
Astanada senat jiynynyń arasynda tilshiler Baqyt Sultanovtan "Ulttyq bank tóraǵasy, sarapshylar teńgeniń qunsyzdanýy rýblge bailanysty ekenin aitady. Sol sebepti Eýraziia ekonomikalyq odaǵynan shyǵý kerek degen pikirler aitylyp júr. Osyǵan ne deisiz?" dep surady. Sultanov "Integratsiialaný bastamasy Qazaqstannan shyqty. Sondyqtan (odaqqa - red.) qatysýshy elder arasyndaǵy kedergilerdi joiý jumystaryn jalǵastyrý kerek. Osyndai úlken naryq arqyly keleshekte jahandyq daǵdarystarǵa qarsy shyǵýǵa bolady", - dedi.
Ministr buǵan qosa dollar baǵamynyń qymbattaýy "respýblikalyq biýdjetke ázirge áser etpeitinin" jáne "qosymsha shyǵyn keltirmeitinin" málimdedi. Ol biylǵy biýdjet dollardyń ortasha baǵamy 340 teńge degen eseppen bekitilgenin, al biyl alǵashqy alty aida dollar baǵamy bul mejeden tómen bolǵandyqtan, josparlanǵan qarjy únemdelgenin aitty.
AQSh-tyń taiaýda Reseige jańa sanktsiialar salýyna bailanysty Resei rýbliniń quny tómendei bastaǵan. Osydan keiin Qazaqstan ulttyq valiýtasy - teńgeniń dollarǵa shaqqandaǵy baǵamy da tómendei tústi. Qazaqstan qor birjasynda 6 qyrkúiekte tańǵy sessiiada dollardyń ortasha baǵamy 371 teńge 80 tiynǵa jetti. Birja málimetinshe, dollar sońǵy bir aida 22 teńge 98 tiynǵa qymbattap otyr.
4 qyrkúiekte úkimet otyrysynda sóilegen Ulttyq bank tóraǵasy Daniiar Aqyshev kelesi jyly Reseige qarsy sanktsiialar áserinen Qazaqstanda infliatsiia deńgeii joǵarylaidy degen boljam baryn málimdegen.
"2019-2020 jyldary infliatsiia joǵarylap, belgilengen mejeden asyp túsýi yqtimal. Bul eń aldymen, Reseige qarsy sanktsiialarmen bailanysty bolmaq. Ekinshiden, buǵan ulttyq valiýtanyń qunsyzdanýy, úshinshiden, munai baǵasynyń arzandaýy áser etedi. Bul áleýmettik shyǵyndar men nesie kóleminiń artýymen de bailanysty" degen Daniiar Aqyshev.
